भैरहवा । नेपालका लागि एमजी मोटर इन्डियाको आधिकारिक वितरक जीओ अटोमोबाइल्स प्रालि र विद्युतीय सवारीमार्फत यात्रा सेवा सञ्चालन गर्दै आएको ई ड्राइभ लुम्बिनी नेपाल प्रालिबीच ५० थान विद्युतीय एमजी विन्डसर कम्युट कार खरिद–बिक्रीका लागि सम्झौता भएको छ ।

बिहीबार भैरहवामा एक कार्यक्रमको आयोजना गर्दै दुबै पक्षले सम्झौतामा हस्ताक्षर गरेका छन् ।

व्यावसायिक सवारी साधन तथा यात्रा सेवा क्षेत्रमा विद्युतीय सवारीको प्रयोग विस्तार गर्ने उद्देश्यले भएको सम्झौताअनुसार पहिलो चरणमा १६ थान गाडी हस्तान्तरण भइसकेका छन् । बाँकी गाडी आगामी डेढ महिनाभित्र उपलब्ध गराउने तयारी रहेको जीओ अटोमोबाइल्सका निर्देशक आर्यमान गोल्छाले बताए । उनले १०२ वर्ष पुरानो गोल्छा अर्गनाइजेसन अन्तर्गतको जीओ अटोमोबाइल्सले सन् २००९ देखि सवारीसाधनको क्षेत्रमा काम गर्दै आएको बताए । उनका अनुसार जीओ अटोमोबाइल्सले यस वर्ष जेएसडब्ल्यू र एमजीसँगको सहकार्यमा नेपालमा एमजी ब्रान्डका सवारीसाधन भित्रयाएको हो ।

जीओ अटोमोबाइल्सका डिलर इन्चार्ज तथा समग्र सञ्चालन प्रमुख प्रकाश शाक्यले एमजी विन्डसर कम्युटलाई विशेषगरी व्यावसायिक सवारीसाधनका रुपमा प्रयोग गर्न मिल्ने गरी नेपालमा ल्याइएको बताए ।

‘एमजीसँग सहकार्य गरी गाडी आयात गर्न थालेको तीन–चार महिना भएको छ । यस अवधिमा ई ड्राइभ लुम्बिनी नेपालसँग भएको ५० थान गाडीको सम्झौता नै हाम्रो पहिलो ठूलो परिमाणको कारोबार हो,’ शाक्यले भने ।

भारतीय उत्पादन भएकाले गाडीका आवश्यक पुर्जा तथा बिक्रीपछिको सेवा सहज रुपमा उपलब्ध हुने उनले बताए । भारतका विभिन्न क्षेत्रमा गाडीका पुर्जा सहजै पाइने भएकाले नेपालमा समेत सेवा तथा मर्मतमा समस्या नहुने उनको भनाइ छ । शाक्यका अनुसार गाडीमा तीन वर्ष वा एक लाख किलोमिटरसम्मको वारेन्टी उपलब्ध छ ।

ई ड्राइभ लुम्बिनी नेपालका अध्यक्ष राजकुमार गुप्ताले एमजी विन्डसर कम्युटको आगमनसँगै लुम्बिनी प्रदेशमा यसको औपचारिक सुरुआत भएको बताए । उनका अनुसार ई ड्राइभ लुम्बिनी नेपालभर एमजी विन्डसर कम्युटको पहिलो ठूलो परिमाणको खरिदकर्ता बनेको छ ।

‘गाडी निकै फराकिलो र आरामदायी छ । भारतीय उत्पादन भएकाले यसका पुर्जा तथा प्राविधिक सेवा छिटो उपलब्ध हुन्छ । आवश्यकता परेको अवस्थामा भारतबाट एकै दिनमा प्राविधिक जनशक्ति बोलाउन सकिने सुविधा पनि छ,’ गुप्ताले भने ।

अनलाइनमार्फत ट्याक्सी तथा मोटरसाइकल यात्रा सेवा सञ्चालन गर्दै आएको ई ड्राइभ लुम्बिनीले आफ्नो सवारीसाधनको समूहमा थप सुविधायुक्त तथा फराकिलो श्रेणीको विद्युतीय कार थप गरेको हो । पहिलो चरणमा १६ थान गाडी विभिन्न व्यवसायीलाई हस्तान्तरण गरिएको छ ।

एमजी विन्डसर कम्युटमा १०० किलोवाट क्षमताको विद्युतीय मोटर र २०० न्यूटन मिटर टर्क रहेको छ । यसमा ३८ किलोवाट–घण्टा क्षमताको ब्याट्री प्रयोग गरिएको छ, जसले एकपटक पूर्ण चार्ज गर्दा करिब ३३० किलोमिटरसम्म यात्रा गर्न सक्ने कम्पनीको दाबी छ ।

यात्रुको आरामलाई ध्यानमा राख्दै गाडीमा १३५ डिग्रीसम्म ढल्काउन मिल्ने आरामदायी सिट जडान गरिएको छ । तीव्र गतिमा ब्याट्री चार्ज गर्न सकिने भएकाले व्यावसायिक प्रयोजनमा गाडी लामो समयसम्म सञ्चालनविहीन राख्नुपर्ने अवस्था कम हुने जीओ अटोमोबाइल्सका डिलर इन्चार्ज प्रमुख प्रकाश शाक्यले बताए ।

ई ड्राइभको सेवा प्रणालीमा यात्रु तथा चालकको सुरक्षाका लागि प्रत्यक्ष निगरानी, आपत्कालीन सम्पर्क तथा बीमा सुविधासमेत उपलब्ध रहेको कम्पनीले जनाएको छ ।