काठमाडौं । नेपाल माइक्रो इन्स्योरेन्स कम्पनी लिमिटेडको आइपिओ (प्रारम्भिक सार्वजनिक निष्काशन) को बाँडफाँड शुक्रबार सम्पन्न भएको छ। एनआइएमबि एस क्यापिटल लिमिटेडको निष्काशन तथा बिक्री प्रबन्धकत्वमा रहेको उक्त कम्पनीले प्रति शेयर रु. १०० को दरमा १८ लाख ४५ हजार साधारण शेयर सर्वसाधारणका लागि निष्काशन गरेको थियो। यसको लागि आवेदन मिति २०८१÷११÷११ देखि २०८१÷११÷१५ सम्म खुल्ला गरिएको थियो।

यस अवधिमा सि–आस्बा सदस्य बैंक तथा वित्तीय संस्थाहरू मार्फत कुल १८ लाख १७ हजार १४८ जना आवेदकबाट २ करोड २४ लाख ४६ हजार ३५० कित्ता शेयरका लागि आवेदन प्राप्त भएको थियो। तर, १०,३८६ जना आवेदकबाट १ लाख ७१ हजार ९६० कित्ता शेयरका लागि रितपूर्वक आवेदन नरहेकाले उक्त आवेदनहरू रद्द गरिएको छ। यसरी जम्मा १८ लाख ६ हजार ७६२ जना आवेदकलाई गोलाप्रथा मार्फत मिति २०८१÷११÷२३ गते बिहान ८:३० बजे शेयर बाँडफाँड गरिएको बिक्री प्रबन्धकले जानकारी दिएको छ।

नेपाल माइक्रो इन्स्योरेन्स कम्पनी लिमिटेडको कूल २२ लाख ५० हजार कित्ता साधारण शेयर मध्ये १० प्रतिशत (२ लाख २५ हजार कित्ता) नेपाल सरकारको सम्बन्धित निकायबाट श्रम स्वीकृति प्राप्त गरी वैदेशिक रोजगारीमा रहेका नेपाली नागरिकहरूलाई, ३ प्रतिशत (६७ हजार ५ सय कित्ता) कम्पनीका कर्मचारीहरूलाई र ५ प्रतिशत (१ लाख १२ हजार ५ सय कित्ता) सामूहिक लगानी कोषहरूलाई बाँडफाँड गरिसकेपछि बाँकी रहेको १८ लाख ४५ हजार कित्ता साधारण शेयर सर्वसाधारणका लागि निष्काशन गरिएको थियो।

यसरी नेपाल माइक्रो इन्स्योरेन्स कम्पनी लिमिटेडको आइपिओ प्रक्रिया सफलतापूर्वक सम्पन्न भएको छ।