काठमाडौं । मानुषी लघुवित्त वित्तीय संस्था लिमिटेडको छैठौं वार्षिक साधारण सभा आइतबार भक्तपुरको होटल भ्यू, जगातीमा सम्पन्न भएको छ। सभामा सञ्चालक समितिका अध्यक्ष पद्मासना शाक्यले प्रस्तुत गरेको वार्षिक प्रतिवेदन सर्वसम्मतिले पारित भएको छ।

कार्यक्रममा प्रमुख कार्यकारी अधिकृत शोभा बज्राचार्यले स्वागत मन्तव्य व्यक्त गर्दै संस्थाको समग्र प्रगति तथा भावी योजनाबारे प्रकाश पारिन्। उनले शेयरधनीहरूलाई आश्वस्त पार्दै अर्को वर्षबाट लाभांश वितरण गर्न सक्ने अवस्थामा संस्थालाई पुर्‍याउन प्रतिबद्ध रहेको बताइन्।

छ वर्ष पूरा गरिसकेको मानुषी लघुवित्तले हाल १४ वटा जिल्लामा ३६ वटा शाखा मार्फत वित्तीय सेवा प्रदान गरिरहेको छ। हालसम्म १० अर्ब ९३ करोड ७५ लाख रुपैयाँ शेयर पूँजी रहेको संस्थाको जगेडा कोषमा ४ करोड २३ लाख ३४ हजार ७३२ रुपैयाँ रहेको छ।

संस्थाको प्रति शेयर आम्दानी (EPS) -७.२२ रहेको छ, जुन अघिल्लो वर्षको -३८.२५ भन्दा उल्लेखनीय सुधार हो। समीक्षाधीन अवधिमा ३३,७१८ सदस्यहरूबाट ९८ करोड ७८ लाख रुपैयाँभन्दा बढी निक्षेप संकलन गरिएको संस्थाले जनाएको छ।

संस्थाले आगामी वर्ष अझ राम्रो वित्तीय स्थायित्व कायम गर्दै शेयरधनीहरूलाई लाभांश वितरण गर्ने लक्ष्य राखेको छ।