काठमाडौं । नेक्सजेन म्यानेजमेन्ट एण्ड इक्विटी सोलुसन्स लिमिटेडले सर्वसाधारणका लागि साधारण शेयर (IPO) निष्काशन गर्ने तयारी गर्दै निष्काशन तथा बिक्री प्रबन्धकमा लक्ष्मी सन्राइज क्यापिटल लिमिटेडलाई नियुक्त गरेको छ। कम्पनीले रु. १०० अंकित मूल्यका १५,००,००० कित्ता साधारण शेयर जारी गर्दै रु. १५ करोड बराबरको पूँजी सर्वसाधारणबाट जुटाउनेछ।

यस सम्बन्धी द्विपक्षीय सम्झौता नेक्सजेनका प्रबन्ध सञ्चालक श्री रमेश कुमार भट्टराई तथा लक्ष्मी सन्राइज क्यापिटलका प्रमुख कार्यकारी अधिकृत श्री बिजय लाल श्रेष्ठबीच २०८२ मंसिर ८ गते क्यापिटलको नयाँ बानेश्वरस्थित कार्यालयमा हस्ताक्षर गरिएको हो। सम्झौता अनुसार निकट भविष्यमै साधारण शेयर निष्काशनको प्रक्रिया अघि बढाइनेछ।

नेक्सजेन म्यानेजमेन्ट एण्ड इक्विटी सोलुसन्स लिमिटेडको अधिकृत पूँजी १०० करोड तथा जारी पूँजी ५० करोड रहेको छ। कम्पनीले स्थापनाको तेस्रो वर्षदेखि लगातार छ वर्षसम्म खुद मुनाफा आर्जन गर्दै आएको छ। गत वर्ष नगद लाभांश वितरण गरिएको र यस वर्षको खुद मुनाफा जगेडा कोषमा सारिएको जनाएको छ। साथै कम्पनीको नेटवर्थ शेयरको अंकित मूल्यभन्दा उच्च रहेको छ।

कम्पनीका अध्यक्ष पूर्व बैंककर्मी तथा बीमा प्राधिकरणका पूर्व अध्यक्ष देवेन्द्र प्रताप शाह रहेका छन्। सम्झौता समारोहमा कम्पनीका शेयरधनीहरू श्री विजय बहादुर शाह र श्री कमल पन्थीको उपस्थिति रहेको थियो।