काठमाडौं । ललितपुरको कार्यविनायक, भैँसेपाटीमा एलजी इलेक्ट्रोनिक्सले आफ्नो साझेदार क्लासी क्लिनसँग मिलेर नेपालकै पहिलो आधुनिक लन्ड्री लाउन्ज सञ्चालनमा ल्याएको छ। उद्घाटन समारोह चौधरी ग्रुपका प्रबन्ध निर्देशक निर्वाण चौधरी र एलजी बंगलादेशका प्रबन्ध निर्देशक जेराल्ड चुनले संयुक्त रूपमा गरेका हुन्।

एलजी लन्ड्री लाउन्ज प्रोफेसनल–ग्रेड वासर र ड्रायरमा आधारित आधुनिक व्यावसायिक लन्ड्रोम्याट अवधारणामा तयार गरिएको हो। कम्पनीका अनुसार, यसले अत्याधुनिक उपकरण र आकर्षक भिजुअल पहिचानमार्फत लन्ड्रोम्याटको नयाँ अनुभव प्रदान गर्दछ। यहाँ लुगा धुने काम केवल दैनिकी मात्र नभई आरामदायी र डिजाइनर शैलीमा सजाइएको वातावरणमा रमाइलो अनुभव बन्छ।

लन्ड्री लाउन्जमा एलजी कमर्सियल लन्ड्री सिस्टम जडान गरिएको छ, जसले उच्च गुणस्तरीय धुने तथा सुकाउने सेवा, कपडाको राम्रो हेरचाह, पानी र ऊर्जा बचत सुनिश्चित गर्छ। ड्रायरहरूले उच्च तापक्रमको हावाको प्रयोग गरी कपडालाई स्यानिटाइज पनि गर्छन्।

ग्राहकहरूले हप्ताको ७ दिन बिहान ८:०० देखि बेलुका ७:०० बजेसम्म सेवा लिन सक्नेछन्। साथै, ड्रप अफ र पिक अप सुविधा पनि उपलब्ध छ।

एलजी लन्ड्री लाउन्जको यो नयाँ पहलले नेपालमा लन्ड्रोम्याट सेवामा नयाँ स्तर स्थापना गरेको कम्पनीले जनाएको छ।