स्वास्थ्य मन्त्रालय र सरकारी चिकित्सकको वार्ता निष्कर्षविहिन, आन्दोलन जारी रहने
Monday Feb 25, 2019
वि.सं.२०७५ फागुन १३ सोमवार ०८:५३
काठमाडौं फागुन १३ । कर्मचारी समायोजन विधेकविरुद्ध आन्दोलनरत सरकारी चिकित्सक र स्वास्थ्य मन्त्रालयबीच आज (सोमबार) भएको वार्ता असफल भएको छ ।
सरकारी चिकित्सकले ७२ घण्टे अल्टिमेटम दिएको भोलिपल्ट आज सोमबार स्वास्थ्य मन्त्रालयले वार्ताको लागि सरकारी चिकित्सकलाई बोलाएको थियो । वार्ताका लागि मन्त्रालयका तर्फबाट स्वास्थ्य राज्यमन्त्री डा. सुरेन्द्रकुमार यादव, सचिव डा. पुष्पा चौधरी र अर्का सचिव चन्द्रकुमार घिमिरे थिए ।
सरकारी चिकित्सकका तर्फबाट भने नेपाल चिकित्सक संघका अध्यक्ष डा. मुक्तिराम श्रेष्ठ, सरकारी चिकित्सक संघका अध्यक्ष डा. दिपेन्द्र पाण्डे, उपाध्यक्ष डा. सुनिल पौडेललगायत सहभागी थिए ।
वार्तामा मन्त्रालयको टोली सरकारी चिकित्सकका मागका विषयमा गम्भीर नभएपछि वार्ता निष्कर्षविहीन भएको सरकारी चिकित्सक संघका अध्यक्ष डा. दिपेन्द्र पाण्डेले जानकारी दिएका छन् । उनले सरकारले माग पूरा नगरे आन्दोलन जारी रहने बताएका छन् ।
