काठमाडौं । अष्ट्रियन मोटरसाइकल निर्माता केटीएम इन्डियाले भारतीय बजारमा २०२६ संस्करणको केटीएम २०० ड्युक आधिकारिक रूपमा सार्वजनिक गरेको छ । कम्पनीले नयाँ मोडललाई २ लाख भारतीय रुपैयाँभन्दा कम मूल्यमा उपलब्ध गराएको जनाएको छ ।

नयाँ २०२६ संस्करणको सबैभन्दा आकर्षक परिवर्तन यसको एट्लान्टिक ब्लु रङ संयोजन हो, जसमा ब्लु र ओरेन्जको मिश्रणले केटीएमको परम्परागत आक्रामक डिजाइनलाई निरन्तरता दिएको छ ।

यस संस्करणमा केही प्राविधिक सुधारसमेत गरिएको छ । बाइकमा नयाँ हलुका अलोय ह्विल जडान गरिएको छ भने अगाडिको डिस्क ब्रेकको आकार ३०० एमएमबाट बढाएर ३२० एमएम बनाइएको छ । ड्युअल च्यानल एबीएस प्रणाली यथावत् राखिएको छ भने सुपरमोटो एबीएस सुविधा पनि उपलब्ध छ ।

सस्पेन्सन प्रणालीमा पनि परिवर्तन गरिएको छ । अगाडि ३७ एमएम डब्ल्यूपी एपेक्स यूएसडी फोर्क प्रयोग गरिएको छ, जुन अघिल्लो ४३ एमएम फोर्कभन्दा फरक छ । ग्र्याब रेल र रियर फुटपेग पुनः डिजाइन गरिएको छ भने पछाडिको टायरको चौडाइ १५० सेक्सनबाट घटाएर १४० सेक्सन गरिएको छ ।

इन्जिनमा भने कुनै परिवर्तन गरिएको छैन । यसमा १९९ सीसी क्षमताको लिक्विड कुल्ड इन्जिन जडान गरिएको छ, जसले १०,००० आरपीएममा २५ पीएस पावर र ८,००० आरपीएममा १९.३ एनएम टर्क उत्पादन गर्छ । इन्जिन ६ स्पिड गियरबक्ससँग जोडिएको छ ।

फिचरका रूपमा यसमा टीएफटी इन्स्ट्रुमेन्ट कन्सोल, ब्लुटुथ कनेक्टिभिटी र स्मार्टफोन इन्टिग्रेशन उपलब्ध छन्, तर क्रुज कन्ट्रोल र ट्रयाक्सन कन्ट्रोल भने समावेश गरिएको छैन ।

नयाँ २०२६ केटीएम २०० ड्युकले आकर्षक डिजाइन, सुधारिएको सस्पेन्सन र प्रतिस्पर्धी मूल्यका कारण बजारमा ठूलो ध्यान तान्ने अपेक्षा गरिएको छ ।