काठमाडौं । अन्तर्राष्ट्रिय बजारमा पेट्रोलियम पदार्थको आकस्मिक मूल्य बृद्धि र आपूर्ति चुनौतीका कारण नेपाल आयल निगम लिमिटेडले पेट्रोल र डिजेल/मट्टितेलको खुद्रा मूल्य वृद्धि गरेको छ। निगमले सार्वजनिक उपभोक्ता र सरोकारवालालाई यसबारे सचेत गर्दै मूल्य कम भएमा तत्काल घटाउने प्रतिबद्धता व्यक्त गरेको छ।

निगमका प्रवक्ता अनुसार, मूल्य समायोजन नहुँदा इन्डियन आयल कर्पोरेशनलाई भुक्तानी गर्न असमर्थता र आपूर्ति प्रणालीमा अवरोध उत्पन्न हुने अवस्था सिर्जना भएको थियो। त्यसैले निगमले बाध्यतावश पेट्रोलियम पदार्थको मूल्य अपेक्षाभन्दा बढी बढाउनु परेको हो।

सार्वजनिक सवारी तथा ढुवानीमा प्रयोग हुने डिजेलमा अत्यधिक मूल्य बृद्धि भएता पनि निगमले उपभोक्ताको सहजता र सार्वजनिक सवारी सञ्चालनलाई ध्यानमा राख्दै लचिलो रणनीति अपनाएको जनाएको छ।

नयाँ खुद्रा बिक्री मूल्य यस प्रकार छ:

पेट्रोलियम पदार्थ पुरानो मूल्य (रु./लिटर) नयाँ मूल्य (रु./लिटर)
पेट्रोल १५४.५०–१७२.०० १६९.५०–१७२.००
डिजेल/मट्टितेल १३९.५०–१५२.०० १४९.५०–१५२.००

(नोट: पहिलो वर्गमा चारआली, विराटनगर, जनकपुर, अमलेखगञ्ज, भलवारी, नेपालगञ्ज, धनगढी र वीरगञ्ज; दोस्रो वर्गमा सुर्खेत र दाङ; तेस्रो वर्गमा काठमाडौं, पोखरा र दिपायल।)

हालको मूल्य वृद्धिपछि पनि निगमलाई पाक्षिक करिब ३ अर्ब ९३ करोड घाटा हुने अनुमान छ। निगमले सबै उपभोक्तासँग सहकार्यको आह्वान गर्दै अन्तर्राष्ट्रिय बजारमा मूल्य कम हुनासाथ मूल्य घटाउने रणनीति अवलम्बन गर्ने आश्वासन दिएको छ।