काठमाडौं। नागरिक लगानी कोष र काठमाडौं विश्वविद्यालय बीच उपदान कोष सञ्चालनसम्बन्धी सम्झौता भएको छ।

सोमबार सम्पन्न उक्त सम्झौतामा कोषका कार्यकारी निर्देशक पर्वत कुमार कार्की र विश्वविद्यालयका तर्फबाट प्रा.डा. राजीव श्रेष्ठ ले हस्ताक्षर गरेका हुन्। सम्झौता समारोहमा विश्वविद्यालयका उपकुलपति प्रा.डा. अच्युतप्रसाद वाग्ले समेत उपस्थित रहेका थिए।

सम्झौताअनुसार विश्वविद्यालयले वार्षिक रूपमा कट्टा गरी पठाएको रकम कोषले सम्बन्धित शिक्षक तथा कर्मचारीको खातामा अद्यावधिक गर्नेछ। साथै, कोष ऐनअनुसार उक्त रकमबाट प्राप्त ब्याज तथा प्रतिफल पनि सम्बन्धित खातामा जम्मा गरिने व्यवस्था गरिएको छ।

यसका अतिरिक्त, विश्वविद्यालयका स्थायी शिक्षक तथा कर्मचारीले कोषको नियमअनुसार ऋण तथा सापटी सुविधा समेत प्राप्त गर्नेछन्। त्यस्तै, विश्वविद्यालयको सिफारिसमा सेवानिवृत्त शिक्षक तथा कर्मचारीलाई उपदान रकम कोषमार्फत भुक्तानी गरिनेछ।

यस सम्झौताले विश्वविद्यालयका कर्मचारीहरूको आर्थिक सुरक्षा तथा बचत व्यवस्थापनलाई थप व्यवस्थित बनाउने विश्वास गरिएको छ।