काठमाडौं । एन आईसी एशिया बैंक ले ‘ग्लोबल मनी विक २०२६’ को अवसरमा देशभर वित्तीय साक्षरता अभिवृद्धि गर्ने उद्देश्यले सञ्चालन गरेको सप्ताहव्यापी कार्यक्रमबाट ४ हजारभन्दा बढी विद्यार्थी तथा युवाहरु लाभान्वित भएका छन्।

नेपाल राष्ट्र बैंक को राष्ट्रिय संयोजनमा आयोजित उक्त अभियान अन्तर्गत बैंकका सातै प्रदेशस्थित शाखाहरुले विभिन्न विद्यालय तथा कलेजहरुमा वित्तीय साक्षरता सम्बन्धी कार्यक्रम सञ्चालन गरेका थिए। कार्यक्रममा सहभागी विद्यार्थी तथा युवाहरुलाई वित्तीय ज्ञान, सीप तथा सकारात्मक वित्तीय व्यवहार विकासमा केन्द्रित प्रशिक्षण तथा अन्तरक्रियात्मक गतिविधिहरु प्रदान गरिएको बैंकले जनाएको छ।

बैंकका अनुसार, सप्ताहभर सञ्चालन गरिएका ६७ भन्दा बढी कार्यक्रममार्फत ४ हजार १ सयभन्दा धेरै विद्यार्थी तथा युवाहरु प्रत्यक्ष रूपमा लाभान्वित भएका छन्। साथै, वित्तीय साक्षरता र जनचेतना अझ व्यापक बनाउन बैंकले विभिन्न सचेतनामूलक सामग्री तयार गरी आफ्ना सामाजिक सञ्जालमार्फत पनि सार्वजनिक गरेको थियो।

नेपाल राष्ट्र बैंकको निर्देशनअनुसार सञ्चालन गरिएको यस अभियानले बालबालिका, विद्यार्थी तथा युवाहरुमा वित्तीय ज्ञान, सीप तथा सचेतना अभिवृद्धि गर्न महत्वपूर्ण योगदान पुगेको बैंकले विश्वास लिएको छ।

बैंकका प्रमुख–ब्रान्डिङ्ग एण्ड मिडिया डिपार्टमेन्ट धिरेन्द्र प्रसाद वाग्लेका अनुसार, यस्ता कार्यक्रमहरुले दीर्घकालीन रूपमा जिम्मेवार वित्तीय व्यवहार विकासमा टेवा पुग्ने अपेक्षा गरिएको छ।