काठमाडौं । NIC Asia Bank Limited र Everest Hospital बीच ग्राहकहरूलाई विशेष छुट सुविधा उपलब्ध गराउने सम्बन्धमा समझदारी पत्रमा हस्ताक्षर भएको छ।

वैशाख ९, २०८३ मा सम्पन्न उक्त समझदारीअनुसार बैंकका ग्राहकहरूले एभरेष्ट हस्पिटलमा उपचार गर्दा विभिन्न सेवामा छुट सुविधा प्राप्त गर्न सक्नेछन्। सम्झौतामा बैंकका तर्फबाट चिफ ट्रान्जेक्सन बैंकिङ्ग नरेन्द्र मैनाली र हस्पिटलका तर्फबाट प्रशासन प्रमुख दीपक चन्द्र बरालले हस्ताक्षर गरेका हुन्।

सम्झौता अनुसार ग्राहकहरूले डिजिटल भुक्तानीमार्फत भुक्तानी गर्दा १५ प्रतिशतसम्म छुट पाउनेछन्। त्यस्तै, अपरेसन सेवामा ५ प्रतिशत र हस्पिटलको फार्मेसीबाट औषधि खरिद गर्दा १० प्रतिशतसम्म छुट सुविधा उपलब्ध हुनेछ।

यो सुविधा लिनका लागि ग्राहकहरूले बैंकको डेबिट कार्ड, क्रेडिट कार्ड वा मोबाइल बैंकिङ्ग एप (मोबैंक) प्रयोग गरी भुक्तानी गर्नुपर्नेछ। डाक्टर परामर्श, एम्बुलेन्स शुल्क तथा आउटसोर्स सेवाहरूमा भने छुट लागू नहुने जनाइएको छ।

बैंकका अनुसार यो सहकार्यले ग्राहकलाई स्वास्थ्य उपचारमा आर्थिक राहत दिनुका साथै डिजिटल भुक्तानी प्रणालीलाई प्रवर्द्धन गर्दै नगदरहित कारोबारलाई प्रोत्साहन गर्ने अपेक्षा गरिएको छ।