काठमाडौं । नेपाल एसोसिएसन फर सफ्टवेयर एण्ड आईटी सर्भिसेस कम्पनीज् (NAS-IT) ले नेपालको सूचना प्रविधि (आईटी) क्षेत्रलाई अन्तर्राष्ट्रिय बजारसँग जोड्ने उद्देश्यसहित “नेपाल टेक रोडशो यूएसए २०२६” आयोजना गर्ने घोषणा गरेको छ।

यो कार्यक्रम सन् २०२६ मे १५ मा अमेरिकाको टेक्सास राज्यको ग्रेपभाइनस्थित Embassy Suites by Hilton मा आयोजना हुनेछ।

NAS-IT का अनुसार यस रोडशोको मुख्य उद्देश्य नेपाली आईटी क्षमतालाई विश्व बजारमा प्रवर्द्धन गर्नु, अमेरिकी कम्पनीहरू तथा लगानीकर्तासँग व्यावसायिक सम्बन्ध विस्तार गर्नु र नेपाललाई सफ्टवेयर विकास, कृत्रिम बौद्धिकता (AI), डाटा तथा डिजिटल ट्रान्सफर्मेसन सेवाको भरपर्दो गन्तव्यका रूपमा स्थापित गर्नु हो।

यसअघि भएका अन्तर्राष्ट्रिय पहलहरूको सफलतापछि आयोजना हुन लागेको यो कार्यक्रमले नेपाली आईटी कम्पनीहरूलाई अमेरिकी बजारसँग प्रत्यक्ष रूपमा जोड्ने अपेक्षा गरिएको छ।

NAS-IT का संस्थापक अध्यक्ष तथा कार्यकारी बोर्ड सदस्य रिचन श्रेष्ठले नेपालसँग विश्वस्तरीय प्रविधि साझेदार बन्न सक्ने क्षमता रहेको उल्लेख गर्दै यो कार्यक्रम नेपाली टेक इकोसिस्टमलाई विश्वमञ्चमा स्थापित गर्ने महत्वपूर्ण कदम हुने बताए।

पूर्व कार्यक्रम र विस्तार

मुख्य कार्यक्रमअघि मे ८, २०२६ मा अमेरिकाको सान फ्रान्सिस्कोमा “नेपाल टेक कनेक्ट” आयोजना गरिनेछ। यो कार्यक्रम बे एरिया क्षेत्रमा रहेका उद्यमी, लगानीकर्ता र नेपाली पेशाकर्मीहरूसँग नेटवर्किङ तथा छलफलमा केन्द्रित हुनेछ।

सहभागिता र सहकार्य

यस कार्यक्रमको स्थानीय साझेदारका रूपमा नेपालिज अमेरिकन चेम्बर अफ कमर्स (NACOC) र सहकार्य साझेदारका रूपमा अमेरिकन चेम्बर अफ कमर्स इन नेपाल (AmCham Nepal) रहेका छन्।

त्यस्तै, Dexperts Inc. शीर्षक प्रायोजक, Focus Health प्रायोजक र Fusemachines सहयोगी प्रायोजकका रूपमा सहभागी छन्।

प्रमुख आकर्षणहरू

कार्यक्रममा नेपाली आईटी कम्पनीहरूको प्रोजेक्ट शोकेस, अमेरिकी व्यवसाय तथा लगानीकर्तासँग B2B मिटिङ, उद्योग प्रस्तुति र डायस्पोरा नेटवर्किङ सत्रहरू रहनेछन्।

NAS-IT का अनुसार यस पहलले नेपाली कम्पनीहरूलाई अन्तर्राष्ट्रिय अवसर, साझेदारी र अमेरिकी बजार प्रवेशका ढोका खोल्ने अपेक्षा गरिएको छ।

NAS-IT बारे

NAS-IT नेपालमा आईटी क्षेत्रको प्रवर्द्धन गर्ने अग्रणी गैरनाफामूलक संस्था हो, जसले नवप्रवर्तन, बजार पहुँच विस्तार र नेपाललाई ग्लोबल टेक हब बनाउने दिशामा काम गर्दै आएको छ।