काठमाडौं। नर्भिक इन्टरनेशनल हस्पिटल लिमिटेडको शेयर निष्काशन सम्बन्धी बुक–बिल्डिङ प्रक्रिया अन्तर्गत आयोजित ‘रोड शो’ सफलतापूर्वक सम्पन्न भएको छ।

मिति २०८३ वैशाख ११ गते काठमाडौंको म्यारियट होटल, नक्सालमा सम्पन्न उक्त कार्यक्रम निष्कासन तथा बिक्री प्रबन्धक लक्ष्मी सनराइज क्यापिटल लिमिटेडले आयोजना गरेको हो। कार्यक्रममा योग्य संस्थागत लगानीकर्ताहरूको उल्लेखनीय सहभागिता रहेको थियो।
कार्यक्रममा संस्थागत लगानीकर्ताहरूले शेयरको मूल्य निर्धारण, माग तथा मूल्याङ्कन प्रक्रियाबारे आफ्ना धारणा र सुझाव प्रस्तुत गरेका थिए। नर्भिक हस्पिटलका प्रमुख कार्यकारी अधिकृत (CEO) अजयकुमार मिश्रले अस्पतालको हालको सञ्चालन अवस्था, वित्तीय प्रदर्शन, रणनीतिक योजना तथा भविष्य विस्तार योजनाबारे जानकारी दिएका थिए।

लक्ष्मी सनराइज क्यापिटलले बुक–बिल्डिङ प्रक्रिया, मूल्य निर्धारण विधि तथा नियामक व्यवस्था सम्बन्धी प्रस्तुति दिएको थियो। लगानीकर्ताहरूले प्रक्रिया पारदर्शी र विश्वसनीय रहेको प्रतिक्रिया दिएका छन्।

रोड शो सम्पन्न भएसँगै योग्य संस्थागत लगानीकर्ताहरूले आफूले खरिद गर्न चाहेको शेयर संख्या तथा प्रस्तावित मूल्य शिलबन्दी (sealed bid) मार्फत ५ कार्य दिनभित्र, अर्थात् वि.सं. २०८३ वैशाख २१ गते साँझ ५ बजेभित्र नेपाल स्टक एक्सचेन्ज लिमिटेड (NEPSE) मा बुझाउनुपर्ने व्यवस्था गरिएको छ।

हस्पिटलले कार्यक्रममा सहभागी सबै लगानीकर्ता तथा सरोकारवालाप्रति धन्यवाद व्यक्त गरेको छ।