काठमाडौं । शिवम् सिमेन्ट्स लिमिटेड ले सामाजिक उत्तरदायित्व अन्तर्गत विशेष क्षमता भएका रोल्पाका एक बालकको शिक्षामा सहयोग गर्ने निर्णय गरेको छ।

कम्पनीले रोल्पा नगरपालिका–१० धाङ्सी निवासी १२ वर्षीय सन्देश बुढा मगरको अध्ययनका लागि आवश्यक शैक्षिक तथा आवासीय सहयोग उपलब्ध गराउने जनाएको हो। जन्मजात दुबै हात नचल्ने शारीरिक अवस्थाका बाबजुद उनले खुट्टाको सहारामा लेख्दै अध्ययनलाई निरन्तरता दिँदै आएका छन्।

‘Routine of Nepal Banda’ मा प्रकाशित समाचारका आधारमा सार्वजनिक भएको उनको संघर्षपूर्ण कथाबाट प्रभावित हुँदै कम्पनीले सहयोगको पहल गरेको हो। हाल कक्षा ५ उत्तीर्ण गरेका सन्देशलाई रोल्पामा अपाङ्गमैत्री विद्यालयको अभाव र कमजोर आर्थिक अवस्थाका कारण थप अध्ययनमा कठिनाइ भइरहेको थियो।

यसै सन्दर्भमा कम्पनीले काठमाडौंको जोरपाटीस्थित खगेन्द्र नवजीवन विशेष शिक्षा माध्यमिक विद्यालय सँग समन्वय गरी उनको अध्ययनको व्यवस्था मिलाएको छ। साथै, आवास र हेरचाहका लागि अपाङ्ग नवजीवन केन्द्र सँग सहकार्य गरिएको छ।

व्यवस्था अनुसार केन्द्रले सन्देशको बसोबास, हेरचाह तथा अध्ययन समन्वय गर्नेछ भने विद्यालयमा माध्यमिक तहसम्मको अध्ययन गराइनेछ। उक्त अध्ययनका लागि आवश्यक सम्पूर्ण खर्च कम्पनीले अर्धवार्षिक रूपमा उपलब्ध गराउने जनाएको छ।

कम्पनीका अनुसार विशेष आवश्यकता भएका बालबालिकालाई उपयुक्त वातावरणमा गुणस्तरीय शिक्षा दिलाउने उद्देश्यले यो पहल गरिएको हो। सन्देशको आत्मविश्वास र संघर्षबाट प्रेरित यो सहयोगले उनको शैक्षिक यात्रा सहज हुने विश्वास व्यक्त गरिएको छ।

कम्पनीले आगामी दिनमा पनि यस्ता सामाजिक उत्तरदायित्वका कार्यक्रमलाई निरन्तरता दिने प्रतिबद्धता जनाएको छ।