काठमाडौँ । एन आई सी एशिया बैंकले आफ्ना ग्राहकहरूलाई खातामा स्थायी लेखा नम्बर (प्यान) र इमेल ठेगाना अद्यावधिक गर्न आग्रह गरेको छ। बैंकले वैशाख १६, २०८३ मा जारी गरेको प्रेस विज्ञप्तिमा करसम्बन्धी विवरण व्यवस्थापनलाई सहज बनाउन यस्तो अनुरोध गरिएको जनाएको छ।

बैंकका अनुसार ग्राहकको खाताबाट काटिएको कर विवरण “आयकर ऐन २०५८” अनुसार आन्तरिक राजश्व विभागको प्यान प्रणालीमा अनिवार्य रूपमा समावेश गर्नुपर्ने भएकाले समयमै प्यान अद्यावधिक गर्न आवश्यक छ। ग्राहकहरूले बैंकको अनलाइन पोर्टल वा मोबाइल बैंकिङ एपमार्फत “PAN Update” विकल्प प्रयोग गरेर सजिलै प्यान अद्यावधिक गर्न सक्ने व्यवस्था गरिएको छ। साथै, नजिकको शाखा कार्यालयमार्फत पनि आवेदन दिन सकिने सुविधा उपलब्ध रहेको बैंकले जनाएको छ।

बैंकले प्यान अद्यावधिक गरेपछि करकट्टीको विवरण स्वतः राजश्व प्रणालीमा प्रविष्ट हुने र आयकरको अनुसूची–१० मा मिलान हुने जानकारी दिएको छ। यसले ग्राहकलाई करकट्टी प्रमाणपत्र तथा कर चुक्ता प्रमाणपत्र प्राप्त गर्न सहज हुने र बैंकसम्म धाउनुपर्ने झन्झट हट्ने विश्वास बैंकको छ।

विज्ञप्तिमा प्यान अद्यावधिक नगरिएका कारण कर विवरण प्रणालीमा समावेश नभएमा वा भविष्यमा कर समायोजन गर्नुपर्ने अवस्था आएमा बैंक जिम्मेवार नहुने स्पष्ट पारिएको छ। यसैगरी, बैंकले ग्राहकहरूलाई आफ्नो खातामा इमेल ठेगाना पनि अद्यावधिक गर्न अनुरोध गरेको छ। भिडियो केवाईसी सेवा वा मोबाइल बैंकिङ एपमार्फत “Change Email Option” प्रयोग गरी इमेल अद्यावधिक गर्न सकिनेछ। साथै, शाखा कार्यालयमार्फत पनि यो सेवा लिन सकिने बैंकले जनाएको छ।

यदि यसअघि प्यान उपलब्ध गराए पनि कर विवरण समावेश नभएको वा इमेल अद्यावधिक नभएको खण्डमा नजिकको शाखा वा ग्राहक सेवा केन्द्रमा सम्पर्क गर्न बैंकले आग्रह गरेको छ। बैंकका सहायक प्रमुख कार्यकारी अधिकृत (प्रमुख सूचना अधिकारी) जयन्द्र रावलले ग्राहकहरूको सुविधा र पारदर्शिता बढाउन यस्तो व्यवस्था गरिएको बताएका छन्।