एनसेलले प्रतिष्ठित आईएसओ ९००१ र १४००१ मान्यता प्राप्त गरेको छ। यी अन्तर्राष्ट्रिय रूपमा मान्यता प्राप्त मापदण्डहरूले कम्पनीको सधैँ उच्च गुणस्तरीय सेवा प्रदान गर्ने तथा वातावरणीय प्रभावलाई न्यूनतम राख्ने प्रतिबद्धतालाई उजागर गरेका छन्।

आईएसओ ९००१ गुणस्तर व्यवस्थापन प्रणालीको विश्वव्यापी मानक हो, जसले ग्राहकका आवश्यकता तथा नियामक निकायहरूका प्रावधानहरू पूरा गर्न व्यावसायिक प्रतिष्ठानहरूले आवश्यक प्रक्रियाहरू अपनाउने गरेको सुनिश्चित गर्दछ। त्यसैगरी, आईएसओ १४००१ ले वातावरणीय व्यवस्थापन प्रणालीको मापदण्ड निर्धारण गर्दछ, जसले सङ्घसंस्था तथा व्यवसायहरूलाई उनीहरूको वातावरण प्रतिको जिम्मेवारी, फोहरमैला व्यवस्थापन र विद्यमान कानुन तथा नियमहरू प्रभावकारी रूपमा पालना गर्न मार्गदर्शन गर्दछ।

आईएसओ २७००१:२०२२ र आईएसओ २७७०१:२०१९ डाटा सुरक्षा तथा गोपनीयताका मान्यताहरू प्राप्त गरेपछि अब आईएसओ ९००१ र आईएसओ १४००१ को मान्यता पाउनु आफूहरूले प्रदान गर्ने सेवाको गुणस्तरप्रतिको प्रतिबद्धताको प्रमाण भएको एनसेलका प्रमुख कार्यकारी अधिकृत माइकल फोलेले बताएका छन्।

उनले बिजनेस टु कन्ज्युमर, बिजनेस टु बिजनेस वा बिजनेस टु गभरमेन्ट जुनसुकै सेवा भए पनि यी मान्यताहरूले आफ्नो व्यवसाय विश्वव्यापी रूपमा मान्य मापदण्ड अनुसार बलियो रूपमा सञ्चालित छ भन्ने कुरा पुष्टि गरेको उल्लेख गरे। एनसेलले यसअघि पुस २०८१ मा आईएसओ २७००१:२०२२ र आईएसओ २७७०१:२०१९ को मान्यता प्राप्त गरेको थियो, जुन प्रमाणीकरण यो वर्ष पनि नवीकरण गरिएको छ र यस्तो प्रमाणीकरण प्राप्त गर्ने एनसेल नेपालको पहिलो दूरसञ्चार सेवा प्रदायक हो।

यी दुई प्रमाणीकरणहरूले नेपालको द्रुत गतिमा विकास भइरहेको डिजिटल परिदृश्यमा कम्पनीको उत्कृष्ट सञ्चालन र दिगोपनप्रति एनसेलले ध्यान केन्द्रित गरेको कुरालाई पुष्टि गर्दछन्। ग्राहकहरूका लागि यसको अर्थ थप भरपर्दो नेटवर्क पर्फर्मेन्स, अझ उत्तम सेवा गुणस्तर र वातावरणीय रूपमा जिम्मेवार सञ्चालन सुनिश्चितता हो।

त्यस्तै उद्यमी तथा व्यवसायहरूले दक्षता वृद्धि, जोखिम न्यूनीकरण र बढी प्रतिस्पर्धात्मक क्षमता प्राप्त गर्दछन् भने साझेदार, नियामक निकाय तथा लगानीकर्ताहरूले एनसेलको जवाफदेहिता, कम्प्लायन्स र निरन्तर सुधारप्रतिको प्रतिबद्धताबाट आत्मविश्वास प्राप्त गर्न सक्नेछन्। यी प्रमाणीकरणहरूको सदुपयोग गर्दै एनसेल विश्वस्तरीय डिजिटल सेवाहरू उपलब्ध गराउन र पर्यावरणीय संरक्षणलाई पनि प्रवर्द्धन गर्न प्रतिबद्ध रहेको छ।