नागरिक लगानी कोष र नबिल बैंक लिमिटेडबीच बैंकका कर्मचारीहरूको अवकाश कोष व्यवस्थापन गर्ने सम्बन्धी एक महत्त्वपूर्ण सम्झौता भएको छ। उक्त सम्झौता पत्रमा नागरिक लगानी कोषका निर्देशक छविरमण अधिकारी र नबिल बैंकका मानव संशाधन विभाग प्रमुख दिवस कार्कीले हस्ताक्षर गर्नुभएको हो।

यस सम्झौता अन्तर्गत योगदानमा आधारित वा गैर(योगदानमा आधारित उपदान कोष तथा अतिरिक्त अवकाश कोषको व्यवस्थापन गर्ने र गराउने व्यवस्था मिलाइएको छ। सम्झौता अनुसार बैंकका कर्मचारीहरूले मासिक वा वार्षिक रूपमा आफ्नो पारिश्रमिकबाट कोष कट्टी गरी नियमित रूपमा नागरिक लगानी कोषमा रकम जम्मा गर्नुपर्नेछ। कोषले बैंकका कर्मचारीहरूको व्यक्तिगत खाता तयार गरी त्यसको पूर्ण अभिलेख राख्ने जिम्मेवारी लिएको छ भने बैंकको सिफारिसका आधारमा सेवा निवृत्त कर्मचारीहरूलाई अवकाश रकम भुक्तानी गर्ने व्यवस्था समेत कोषले नै मिलाउनेछ।

यसैगरी, बैंकका कर्मचारीहरूले कोषमा जम्मा गरेको रकममा नागरिक लगानी कोष ऐन, नियम, विनियम, निर्देशिका एवं कार्यविधिमा उल्लेख भए बमोजिम ब्याज, प्रतिफल तथा अन्य सेवा(सुविधाहरू प्राप्त गर्नेछन्। बैंकको अवकाश कोष योजनाको व्यक्तिगत खातामा रहेको रकम, ऋण रकम तथा लगानी सहितको विस्तृत विवरण कोषलाई बुझाउनुपर्ने व्यवस्था समेत सम्झौतामा गरिएको छ।

कोषले सेवा निवृत्त वा अवकाश भएका कर्मचारीहरूलाई नियम अनुसार लाग्ने कर कट्टा गरेर मात्र भुक्तानी उपलब्ध गराउनेछ। यस प्रक्रियाका लागि बैंकले आफ्ना कर्मचारीहरूको आवश्यक विवरण कोषलाई उपलब्ध गराउनुपर्ने, मासिक तथा वार्षिक रूपमा कट्टी गरिएको रकम सम्बन्धित कोषमा जम्मा गर्नुपर्ने र सेवा निवृत्त कर्मचारीहरूको अवकाश रकम भुक्तानीका लागि सिफारिस गर्नुपर्ने व्यवस्था रहेको छ। यसका साथै, आयकर ऐन २०५८ बमोजिम स्वीकृत अवकाश कोषका रूपमा सञ्चालित साविकका अवकाश कोषहरूमा रहेको बैंकका कर्मचारीहरूको अवकाश, उपदान र अतिरिक्त अवकाश कोषको रकम अब नागरिक लगानी कोषमा रकम सान्तरण (रकम ट्रान्सफर) गरिने व्यहोरा समेत सम्झौतामा उल्लेख गरिएको छ।