काभ्रे । काभ्रेपलाञ्चोकको बेथानचोक गाउँपालिका–६, काभ्रे भुरुङ्गेटोलमा आएको हुरीबतासका कारण घरको छानो भत्किँदा ७० वर्षीया ठुली माया तामाङको मृत्यु भएको छ।

प्राप्त जानकारीअनुसार हुरीबतासका कारण घरको छानो भत्किएर तामाङमाथि खसेपछि उनी गम्भीर घाइते भएकी थिइन्। घटनास्थलमै उनको मृत्यु भएको स्थानीयले बताएका छन्।

अकस्मात् भएको उक्त घटनाले भुरुङ्गेटोलसहित समग्र बेथानचोक क्षेत्र शोकमा डुबेको छ। हुरीबतासका कारण आसपासका क्षेत्रमा समेत केही भौतिक क्षति पुगेको प्रारम्भिक जानकारी प्राप्त भएको छ।

दिवंगत तामाङप्रति स्थानीयवासी तथा शुभेच्छुकहरूले हार्दिक श्रद्धाञ्जली व्यक्त गरेका छन्। साथै शोकसन्तप्त परिवारजनप्रति गहिरो समवेदना प्रकट गर्दै दुःख सहन सक्ने शक्ति प्राप्त होस् भन्ने कामना गरेका छन्।