काठमाडौं । नेपाल एसबिआई बैंक लिमिटेडको सञ्चालक समितिको अध्यक्षमा मुनीष कुमार चान्दना चयन भएका छन्। बैंकको सञ्चालक समितिको २०८३ साउन २७ गते बसेको ५४८औँ बैठकले भारतीय स्टेट बैंक ९एसबीआई० का प्रतिनिधि चान्दनालाई सर्वसम्मत रूपमा अध्यक्ष चयन गरेको हो।

नवनियुक्त अध्यक्ष चान्दना एसबीआईको मुम्बईस्थित प्रधान कार्यालयको अन्तर्राष्ट्रिय बैंकिङ समूह–२ मा मुख्य महाप्रबन्धकका रूपमा कार्यरत छन्। उनले एसबीआईको पूर्वी तथा दक्षिण एसिया, सिंगापुर र अस्ट्रेलियास्थित अन्तर्राष्ट्रिय बैंकिङ सञ्चालनका साथै विश्वभर रहेका प्रमुख विदेशी सहायक बैंकका लागि रणनीतिक नेतृत्व प्रदान गर्दै आएका छन्।

अध्यक्षमा चयन भएपछि चान्दनाले नेपाल राष्ट्र बैंकका गभर्नर प्रा। डा। विश्वनाथ पौडेलसमक्ष पद तथा गोपनीयताको शपथ ग्रहण गरेका छन्। नेपाल राष्ट्र बैंकको केन्द्रीय कार्यालय बालुवाटारमा आयोजित समारोहमा गभर्नर पौडेलले उनलाई शपथ गराएका हुन्।

शपथ ग्रहण समारोहमा नेपाल राष्ट्र बैंकका डेपुटी गभर्नर किरण पण्डित, कार्यकारी निर्देशकहरू रामु पौडेल र दीर्घबहादुर रावल तथा निर्देशक शरणकुमार अधिकारीको उपस्थिति थियो।

त्यस्तै, एसबीआई भारतका उपप्रबन्ध निर्देशक किशोरकुमार पोलुदासु, नेपाल एसबिआई बैंकका सञ्चालकहरू रितेश सिन्हा, भरत राज वस्ती र अप्सरा उप्रेती, प्रबन्ध सञ्चालक तथा प्रमुख कार्यकारी अधिकृत रामकुमार तिवारी, नायब प्रमुख कार्यकारी अधिकृत तथा प्रमुख सञ्चालन अधिकृत विकास आनन्दलगायत बैंकका उच्च अधिकारीहरूको पनि उपस्थिति रहेको थियो।

बैंकका अनुसार चान्दनाको अन्तर्राष्ट्रिय बैंकिङ तथा रणनीतिक नेतृत्वको अनुभवले नेपाल एसबिआई बैंकको आगामी व्यवसायिक तथा रणनीतिक योजनामा थप योगदान पुग्ने अपेक्षा गरिएको छ।

नेपाल एसबिआई बैंक भारतीय स्टेट बैंकको प्रमुख साझेदारीमा नेपालमा सञ्चालन हुँदै आएको बैंक हो। बैंकले विभिन्न शाखा तथा डिजिटल माध्यममार्फत ग्राहकलाई बैंकिङ सेवा उपलब्ध गराउँदै आएको छ।