काठमाडौं -एसियाली विकास बैंक (एडीबी) ले कोरोना भाइरससँग लड्न नेपाल सरकारलाई २५ करोड अमेरिकी डलर (करिब ३० अर्ब रुपैयाँ) ऋण सहायता उपलब्ध गराउने भएको छ । एसियाली विकास बैंकले मंगलबार उक्त ऋण सहायता स्वीकृत गरेको हो । यस सहायताबाट नेपाललाई कोरोना विरुद्ध लड्न सहयोग पुग्ने एडीबीले बताएको छ ।यस सहुलियतपूर्ण ऋणबाट कोरोनाको महामारीसँग जुध्ने उपायलाई निरन्तरता दिन, गरिब र कमजोर वर्गका लागि सामाजिक संरक्षणका कार्यक्रम विस्तार गर्दै तीव्र आर्थिक सुधारको चरणलाई तय गर्न सहयोग पुग्ने बैंकका अध्यक्ष मात्सुगु असकावाले जानकारी दिए ।

कोरोनाका कारणले हाल नेपालको सार्वजनिक स्वास्थ्यमा समस्या देखिएको उसको भनाई छ । कोरोना र जारी लक डाउनले नेपालको समग्र सामाजिक र आर्थिक विकासमा ठूलो असर पार्ने आशंका गर्दै अध्यक्ष असकावाले समन्वयपूर्ण तरिकाले सरकार र अन्य विकास साझेदारसँग मिलेर काम गर्नेसमेत उल्लेख गरे । एडीबीले उक्त सहयोग ‘एक्टिभ रेसपोन्स एन्ड एक्पेन्डिचर सपोर्ट’ (केरेस) कार्यक्रम अन्तर्गत उपलब्ध गराउन लागेको हो ।यो रकमबाट सातै प्रदेशमा महिला र पुरुषका लागि छुट्टै वार्ड सहितका कम्तीमा २ लाख मानिसका लागि क्वारेन्टाइन सुविधा प्रदान गर्न खर्च गनिरे छ । यसैगरी, प्रतिदिन कम्तिमा ३ हजार कोरोना परीक्षणका लागि यसले सहयोग पुग्ने बैंकले विश्वास लिएको छ । कोरोना विपद्बाट अतिप्रभावित लघु साना र मझौला उद्योगमा पनि अनुदानपूर्ण ऋण दिइनेछ ।