काठमाडौं । ‘शैक्षिक परामर्श, भाषा शिक्षण तथा तयारी कक्षा (सञ्चालन तथा व्यवस्थापन) नियमावली, २०८३’ का विषयमा राष्ट्रिय स्वतन्त्र पार्टी (रास्वपा) र शैक्षिक परामर्श क्षेत्रका व्यवसायीहरूबीच संयुक्त छलफल भएको छ।

रास्वपाको केन्द्रीय कार्यालयमा सम्पन्न छलफलमा पार्टीका महामन्त्री विपिन कुमार आचार्यसँग शैक्षिक परामर्श व्यवसायीहरूले नियमावलीका विभिन्न प्रावधानबारे आफ्ना धारणा र चासो प्रस्तुत गरेका थिए।

छलफलमा शैक्षिक परामर्श क्षेत्रसँग सम्बन्धित १४ वटा संघ–संस्थाका प्रतिनिधि तथा ‘फ्री कन्सल्टेन्ट ग्रुप’का प्रतिनिधिहरूको सहभागिता रहेको थियो। सोही अवसरमा व्यवसायीहरूको संयुक्त तर्फबाट महामन्त्री आचार्यलाई ज्ञापनपत्र पनि हस्तान्तरण गरिएको थियो।

ज्ञापनपत्र बुझ्दै महामन्त्री आचार्यले व्यवसायीहरूले उठाएका विषयलाई गम्भीरतापूर्वक अध्ययन गर्ने आश्वासन दिएका छन्। उनले यस सम्बन्धमा पार्टीका सभापतिसँग आवश्यक छलफल गरी आगामी दिनमा आवश्यक समन्वय, संवाद र पहल गर्ने प्रतिबद्धता व्यक्त गरेका छन्।

छलफलमा सहभागी शैक्षिक परामर्श क्षेत्रका प्रतिनिधिहरूले नियमावलीसम्बन्धी विषयमा आगामी प्रगति र विकासक्रमबारे सम्बन्धित पक्षलाई समयानुकूल जानकारी गराउँदै जाने बताएका छन्।