काठमाडौँ । नौ वटा बैंक प्रवर्द्धक रहेको मेरो माइक्रोफाइनान्स लघुवित्तबाट संस्थापक सेयरधनीले ठूलो हिस्सा सेयर बिक्री गर्ने भएका छन्।

एक अर्ब रुपैयाँ चुक्ता पुँजी भएको कम्पनीमा ६९.४ प्रतिशत संस्थापक सेयर नौ वटा वाणिज्य बैंकहरुको छ। कम्पनीका संस्थापकमध्येको ५ लाख ९८ हजार ५९८ कित्ता सेयर बिक्रीमा राखिएको हो।

यो कुल चुक्ता पुँजीको ५.९८ प्रतिशत हो भने संस्थापक समूहको मात्र ८.६२ प्रतिशत हो। कम्पनीले यो सेयर प्रति कित्ता ५९५ रुपैयाँका दरले बिक्री गर्न लागेको हो। यो न्यूनतम मूल्य हो। यही मूल्यमा बिक्री भएमा ३५ करोड ६१ लाख ६५ हजार ८१० रुपैयाँको डिल हुने छ।

सेयर खरिद गर्न इच्छुकले साउन ३२ गतेसम्म अधिकतम मूल्य खुलाइ आवेदन दिनुपर्ने हुन्छ। कम्पनीको साधारण सेयर दोस्रो बजारमा १६७० रुपैयाँका दरले किनबेच भइरहेको छ। यसको आधा मूल्य संस्थापकको हुने गरेको छ।

गत आर्थिक वर्ष कम्पनीले ४४ करोड ७२ लाख रुपैयाँ खुद नाफा गरेको छ। यसको कुल ऋण लगानी १३ अर्ब ६४ करोड रुपैयाँ छ।

कम्पनीमा ग्लोबल आइएमइ बैंकको १४ प्रतिशत, एनआइसी एसिया, प्रभु, एनएमबि, प्राइम कमर्सियल, लुम्बिनी विकास बैंक र कुमारी बैंकको सात प्रतिशतका दरले लगानी छ। ६.९ प्रतिशत सेयर सिटिजन्स बैंकको छ भने ६.५ प्रतिशत सेयर सिद्धार्थ बैंकको छ।