बागलुङ । राष्ट्रिय सहकारी बैंक लिमिटेड शाखा कार्यालय बागलुङको आ.व. २०७५÷०७६ को पहिलो त्रैमासिक समिक्षा कार्यक्रम बुधवार सम्पन्न भएको छ ।

बैंकका सञ्चालक रामबहादुर जिसीको अध्यक्षतामा सम्पन्न समिक्षा कार्यक्रममा शाखा प्रमुख शैली खड्काले शाखाको चालु आर्थिक वर्षको ३ महिनाको समग्र अवस्था बारेमा जानकारी गराउनु भएको थियो ।

राष्टिय सहकारी बैंकको दोस्रो शाखाका रुपमा २०६५ साल मंसिर २६ गते स्थापना भएको बागलुङ शाखामा हाल २ सय ५० वटा सहकारी संघ संस्था सदस्य रहेको, १ करोड शेयर रकम, ३० करोड बचत र १५ करोड लगानी रहेको शाखा प्रमुख खड्काले जानकारी दिनु भयो ।

वित्तीय कारोबारसंगै सहकारी संघ संस्थाहरुको क्षमता अभिवृद्धि गर्न, शिक्षा तथा तालिम लिएर सहकारीलाई प्रभावकारी बनाउन, सहकारीका सदस्यहरुलाई विभिन्न क्षेत्रको अध्ययन अवलोकन गराई व्यवसायिक दक्षता वृद्धि गर्न सहकारी बैंकले सदस्य सहकारी संघ संस्थाहरुलाई सहयोग गर्दै आएको बैंकका सञ्चालक रामबहादुर जिसीले बताउनु भयो ।

उहाँले सहकारी बैंकले आफ्ना शेयर सदस्य सहकारी संघ संस्थाहरुलाई आगामी साधारणसभाबाट १५ प्रतिशत नाफा दिनुका साथै कारोबारका आधारमा समेत लाभांश दिने तयारी गरेकाले ढुक्क भएर शेयर खरिद गर्न र कारोबार बढाउन आग्रह गर्नु भएको थियो । सहकारी संघ संस्थाहरुको प्रवद्र्धनका लागि स्थापित सहकारी बैंकको १५ वार्षिक साधारणसभा आगामी पुस २१ र २२ गते काठमाडौमा हुने भएको छ ।

समिक्षा कार्यक्रममा नेफ्स्कुनका सञ्चालक चण्डीप्रसाद शर्मा, नेपाल सूचना तथा सञ्चार केन्द्रीय सहकारी संघका लेखा सदस्य खीमबहादुर कार्की, जिल्ला सहकारी संघ बागलुङका अध्यक्ष दिपक गौतम, बहुउद्देश्यीय सहकारी संघका अध्यक्ष दुर्गाबहादुर कुँवर, जिल्ला सहकारी संघका लेखा समितिका संयोजक रुद्रबहादुर केसी, सञ्चालक रतनकुमार मलेपति, लेखा सदस्य लिला खड्का लगायतले बैंकको शाखाले लिएको लक्ष्य पुरा गर्नका लागि समन्वय गर्ने प्रतिवद्धता व्यक्त गर्नु भएको थियो ।

सोही अवसरमा बागलुङ शाखाबाट सरुवा भई केन्द्रीय कार्यालयमा जान लाग्नु भएका वरिष्ठ सहायक बुद्धराम बललाई विदाई गरिएको थियो । बैंकका सञ्चालक जिसीले देशभर कार्यक्षेत्र रहेको बैंकको जुन शाखा वा कार्यालयमा रहेपनि सहकारीको भावना र मर्म अनुसार काम गर्न आग्रह गर्नु भएको थियो ।