काठमाडौं । परराष्ट्रमन्त्री प्रदीप ज्ञवाली जापानको पाँच दिने भ्रमणमा नेपाली प्रतिनिधिमण्डलको नेतृत्व गर्दै आज त्यसतर्फ जाँदै हुनुहुन्छ । जापानी समकक्षी तारो कोनोको निमन्त्रणामा उहाँ जापान जान लाग्नुभएको हो ।

मन्त्रालयका अनुसार, सोमबार नेपाल र जापानबीच मन्त्रीद्वयको नेतृत्वमा प्रतिनिधिमण्डलस्तरीय वार्ता हुँदैछ । त्यसक्रममा दुवै देशका परराष्ट्रमन्त्रीको उपस्थितिमा जापान सरकारबाट नेपाललाई प्राप्त हुने खाद्य सहायतासम्बन्धी हस्ताक्षर समारोह हुनेछ ।

मन्त्री ज्ञवालीले जापानका कृषि तथा वनमन्त्री ताकामोरी योसिकावाका साथै अन्य राजनीतिक नेतृत्वसँग पनि भेटवार्ता गर्ने कार्यक्रम छ । नेपाल लगानी कार्यशालालाई उहाँले प्रमुख वक्ताका रुपमा सम्बोधन गर्ने कार्यक्रम छ ।

मन्त्री नेतृत्वको प्रतिनिधिमण्डलमा जापानका लागि नेपाली राजदूत प्रतिभा राणा, अर्थ र परराष्ट्र मन्त्रालय तथा लगानी बोर्डका अधिकारी सहभागी छन् । जापानबाट स्वदेश फर्कनेक्रममा मंसिर ६ र ७ गते थाइल्याण्डको भ्रमण गर्ने कार्यक्रम छ । मन्त्री ज्ञवाली मंसिर ७ गते शुक्रबार स्वदेश फर्कनुहुनेछ ।