काठमाडौ । प्रधानमन्त्री केपी शर्मा ओलीले सरकार कहाँ छ भनेर प्रश्न गर्नेहरुलाई कटाक्ष गर्दै केही दिनमै जता फर्कियो त्यतै सरकार देखिने बताएका छन् ।

प्रमुख प्रतिपक्ष दल नेपाली कांग्रेसका नेताहरुले केही दिनदेखि ‘सरकार कहाँ छ’ भन्दै आलोचनात्मक टिप्पणी गरिरहेका बेला प्रधानमन्त्री ओलीले भने, ‘हामी जनताका लागि काम गरिरहेका छौँ,अब केही दिनमै जता फर्कियो त्यतै सरकार देखिनेवाला छ, प्रश्न सोध्नेले उत्तर आफैँ पाउनेछन् ।’

मंगलबार सामाजिक सुरक्षा योजनाको घोषणा समारोहमा प्रधानमन्त्री ओलीले श्रमिकको हकहितलाई मध्यनजर गर्दै सरकारले पहिलो पटक श्रमिक र तिनका आश्रित परिवारको लागि सामाजिक सुरक्षा योजना सुरु गर्न लागेकोले सरकार त्यहाँ पनि भेटिने बताए ।

‘अब केही दिनमै मेलम्चीको पानी काठमाडौँ आउँछ, काठमाडौँबाट धुवा धुलो हट्छ, सडकहरु नुहाइन्छ, चिल्ला पारिन्छ,’ ओलीले भने, ‘अनि थाहा हुन्छ सरकार कहाँ छ रु’

उनले सरकार जनताको बीचमा जनताका लागि काम गर्न व्यस्त रहेको बताए । सामाजिक सुरक्षा योजनाको घोषणा गर्न सरकारले अनावश्यक तामझाम गरेको भन्दै आलोचना भइरहेको बेला प्रधानमन्त्री ओलीले सरकार कहाँ छ भन्ने देखाउनकै लागि पनि यत्ति गर्नुपरेको बताए ।

‘यो तामझाम किन भनेर पनि सोधिरहेका छन्, यो तामझाम सरकार देखिएन भन्नेहरुलाई देखाउन र सुनिन भन्नेहरुलाई सुनाउनका लागि पनि हो । हाम्रा योजनाहरुका बारेमा जानकारी गराउन पनि हो । जनताले खुसियालीका साथ यो उत्सव मनाउन भन्नका लागि हो किनभने सामाजिक सुरक्षा योजनाले जनतामा नयाँ उत्साह थपेको छ ।’