मिटरब्याज सम्बन्धी जाँचबुझ आयोगको कार्यालय जनकपुरधाममा स्थापना, गृहमन्त्री श्रेष्ठले गरे कार्यालयको उद्घाटन

काठमाडौं । मटिरब्याजी पीडितको समस्य समाधान गर्न गठित अनुचित लेनदेन सम्बन्धी जाँचबुझ आयोगको कार्यालय धनुषाको जनकपुरधाममा खोलिएको छ ।

उपप्रधान तथा गृहमन्त्री नारायणकाजी श्रेष्ठले आज९आइतवार० बिहान कार्यालयको उद्घाटन गरेका छन् । कार्यालय स्थापना लगतै अब मिटरब्याजसँग सम्वन्धित सम्पूर्ण काम जनकपुरधामबाटै हुनेछ ।

कार्यालय नहुँदा आयोगले सिंहदरवारस्थित गृहमन्त्रालयबाटै काम गर्दै आएको थियो । सरकारले गत २० चैतमा मिटरब्याज पीडितको समस्या समाधान गर्न बिशेष अदालतका पूर्वन्यायधिश गौरीबहादुर कार्कीको संयोजकत्वमा आयोग गठन गरेको थियो ।

कार्यालय उद्घाटनपछि गृहमन्त्री श्रेष्ठले दु्रतगतिमा काम सक्न निर्देशन दिएका छन् ।

आयोगले गत बिहीवार मिटरब्याज पीडितहरूसँग उजुरी आह्वान गरेको थियो । बिज्ञप्ती सार्वजनिक गर्दै आयोगले १७ देखि ३१ वैशाखसम्म उजुरी दिन आह्वान गरेको थियो ।

विज्ञप्तीअनुसार ७७ जिल्लाकै जिल्ला प्रशासन कार्यालयबाट उजुरी गर्न सकिने छ । उजुरीलाई व्यवस्थित गर्न सबै जिल्ला प्रशासन कार्यालयमा मिटरब्याजपीडित सहायता कक्ष स्थापना गरिएको छ । जहाँ कर्मचारीले नै निवेदन फारम भरिदिने आयोगले जनाएको छ ।

मिटरब्याजीपीडितका समस्या मुलुकभरबाट आउन थालेपछि सरकारले गत २७ साउनमा उच्चस्तरीय अध्ययन कार्यदल गठन गरेको थियो ।

कार्यदलले त्यसवेला पनि महिना दिनभित्र सम्बन्धित जिल्ला प्रशासन कार्यालय र प्रहरी कार्यालयमा उजुरी दिन मुलुकभरका पीडितलाई आह्वान गरेको थियो ।

मिटरब्याजको पासोमा मुलुकभर झन्डै दुई लाख पीडित रहेको भनिएको छ । तर, त्यसवेला दुई हजार सात सय ४८ मात्रै उजुरी परेका थिए । जसमध्ये दुई सय १० उजुरी समाधान भएका छन् । ५१ वटा अदालतमा विचाराधीन छन् । चार सय ७२ उजुरी छलफलका क्रममा छन् ।

बाँकी रहेका दुई हजार १५ मध्ये ६० प्रतिशत उजुरी अनुसन्धानका लागि सम्बन्धित प्रहरी कार्यालयमा पठाइएका छन् । तर, उजुरीमाथि प्रहरीले अनुसन्धान प्रक्रिया अघि बढाएको छैन ।