काठमाडौं । नेपाल प्रहरी अस्पताल महाराजगञ्ज र काठमाडौं विश्वविद्यालयबीच चिकित्सा शिक्षा र अन्य विषयहरूमा खोज, अनुसन्धान र प्रशिक्षण कार्यकालागि सम्झौता भएको छ । प्रहरी महानिरीक्षक बसन्त बहादुर कुँवर र काठमाडौं विश्वविद्यालयका उपकुलपति प्राध्यापक डा.भोला थापाले सोमबार सम्झौता पत्रमा हस्ताक्षर गरेका छन् ।

सम्झौतापत्रमा हस्ताक्षरपछि प्रहरी महानिरीक्षक कुँवरले विगतमा काठमाडौं विश्वविद्यालय स्कुल अफ एजुकेशनसँग भएको सम्झौता स्मरण गर्दै अब विश्वविद्यालयसँगको सहकार्यले थप उचाइ मिल्ने बताए । सम्झौताले दुवै पक्षबीच एक आपसमा रहेको ज्ञान र अनुभवका साथै विज्ञताको आदानप्रदान र शैक्षिक कार्यक्रमहरूमा परस्पर सहयोग अभिवृद्धिका लागि मार्ग प्रशस्त गरेको उनले बताए ।

उपकुलपति थापाले नेपाल प्रहरीसँगको सम्झौतामार्फत मेडिकल एजुकेशनमा हातेमालो गर्दै विश्वविद्यालयले थप गुणस्तरीय स्वास्थ्य शिक्षा प्रदान गर्न सहयोगी हुने विश्वास व्यक्त गरे । उनले प्रहरीसँगको सहकार्यलाई थप अगाडि बढाउँदै लैजाने बताए ।

सो सम्झौता पाँच वर्षकालागि लागू हुनेछ । सम्झौता अनुसार अब दुवै पक्षले संयुक्त अनुसन्धान परियोजनाहरू सञ्चालन गर्ने, एकअर्काको शैक्षिक कार्यक्रमहरूमा सक्रिय रूपमा सहभागी हुने, ज्ञान र विशेषज्ञताको आदानप्रदानलाई प्रवद्र्धन गर्न सहयोगी वातावरणलाई बढावा दिने, चिकित्सा एवं स्वास्थ्यको वर्तमान र भविष्यका आवश्यकताहरूलाई सम्बोधन गर्न शैक्षिक कार्यक्रमहरूको विकास र कार्यान्वयनका सम्भावनाहरू अन्वेषण गर्ने उल्लेख छ ।