१७ जेठ काठमाडौं-  ट्राफिक नियमविपरीत बाटो काट्ने तीन हजार ३ सय ४८ जना पैदल यात्रुलाई कारबाही गरिएको छ । मङ्गलवारबाट जेब्राक्रसिङ नभएको ठाउँमा बाटो काट्ने, जथाभावी बाटो काट्नेलाई कारबाही गर्ने पूर्वघोषित कार्यक्रमअनुरुप उनीहरुलाई कारबाही गरिएको ट्राफिक प्रहरी महाशाखाका प्रमुख नायब महानिरीक्षक मिङ्मार लामाले जानकारी दिए ।

उनले भने, ‘कारबाहीमा परेकामध्ये दुई हजार १ सय २० जनाले रू. २ सयका दरले जरिवाना तिरे भने बाँकी एक हजार २ सय २८ जनाले ट्राफिक प्रहरीले दिने जनचेतना कक्षामा सहभागी भए ।’ यसरी कारबाहीमा परेकाबाट रू. चार लाख २४ हजारभन्दा बढी रकम राजस्वमा जम्मा भएको छ । जरिवाना रकम नतिर्नेलाई तीन घण्टा नियन्त्रणमा लिएर आधा घण्टाको सचेतना कक्षा दिइएको थियो ।

सडक दुर्घटनामा मृत्यु हुनेमध्ये ४२ प्रतिशत पैदल यात्रु रहेको विवरणका आधारमा त्यसलाई व्यवस्थित गर्न यस्तो अभियान शुरु गरिएको लामाको भनाइ छ । प्रहरीले भोलिबाट नियमित रुपमा यसलाई कार्यान्वयन गर्ने भएको छ । उनले भने, ‘सडक दुर्घटनमा मृत्यु हुने ४२ प्रतिशत पैदल यात्रु रहेका छन, उनीहरुका कारण सवारीमा रहेका थप चालक र यात्रुको समेत मृत्यु हुन्छ । यसरी ५० प्रतिशतभन्दा बढीको मृत्युका कारण पैदल यात्रु रहेकाले त्यो घटाउने हाम्रो उद्देश्य हो ।’

ट्राफिक प्रहरीले गत वैशाख १ गतेदेखि राजधानीमा सवारीको ‘हर्न’ बजाउन निषेध गरेको छ । राजधानीमा मात्रै बर्षेनि १ सय ५० जनाभन्दा बढीको सडक दुर्घटनामा मृत्यु हुन्छ । रासस