काठमाडौं । सत्तारुढ दल नेपाल कम्युनिष्ट पार्टी (नेकपा) का वरिष्ठ नेता झलनाथ खनालले सरकारको काम सन्तुष्टिजनक नभएको भन्दै असन्तुष्टि जनाएका छन् ।

पूर्व प्रधानमन्त्री समेत रहेका नेता खनालले वर्तमान सरकारको कुनै विकल्प नभए पनि जनअपेक्षा अनुसार सरकारलाई चुस्त बनाउन सरकार पुनर्निर्माण गर्नुपर्ने बताएका हुन् ।

शनिबार पार्टी सचिवालय वैठक वहिष्कार गरेका नेता खनालले आइतबार नयाँवानेश्वरमा आयोजित एक कार्यक्रममा भने, ‘नेपालको कम्युनिष्ट आन्दोलनका लागि चुनौतीको शिखर सगरमाथाभन्दा अग्लो छ ।’

उनले थपे, ‘टुप्पीमा बसेका एउटा नेताले भर्खरै एउटा बैठकमा के उद्गार गर्नुभयो भने नेकपा भनेको कुनै आइडोलोजिकल पार्टी होइन ।’

पार्टी कार्यशैलीप्रति निकै असन्तुष्टि देखाउँदै उनले भने, ‘उसो भए महन्थको पार्टी र नेकपामा के फरक भयो रु कम्युनिस्ट पार्टी भनेको आइडोलोजिकल, सैद्धान्तिक र दार्शनिक पार्टी पनि हो, राजनीतिक पार्टी मात्र होइन ।’

उनले यो सरकार डुबे नेकपा पनि डुब्ने भएकाले सरकारले आफूलाई सच्याउनु पर्ने बताए । नेता खनालले चुनाव खर्चिलो बन्दै गएको भन्दै समाजवादी बाटोतर्फ लैजान सरकारलाई सुझाव दिए । साथै खनालले राष्ट्रियता कमजोर बन्दै गएको समेत बताएका छन् ।

सरकारले समेत थाहा नपाउने गरी गुप्त सम्मेलनहरु भइरहेको खनालले जानकारी गराए । पश्चिमा शक्तिले तराई टुक्राउन खोजिरहेको भन्दै खनालले त्यसतर्फ पनि सचेत रहनुपर्ने बताए ।

उनले शनिबारको वैठक वहिष्कारका बारेमा संक्षिप्त प्रतिक्रिया दिंदै भने, ‘हिजो मात्रै हाम्रो बैठक रोगीका कारण सर्‍यो रे । एउटा रोगी आएछ । खनालले थपे, ‘कहिलेकाँही ३ बजे भनेर बोलाइन्छ, ६ बजे शुरु हुन्छ । आज पनि यस्तै हो कि भनेर हामी हिंड्यौं । ठूलै हल्ला मच्चिए छ ।’