निजगढ नगरपालिकाले नगरबासीहरुलाई इन्डक्सन चुलो वितरण गरेको छ । नगरपालिकाले नगरबासीहरुलाई सहुलियत मूल्यमा इन्डक्सन चुलो वितरण गरेको हो ।

नेपाल सरकार वैकल्पिक ऊर्जा प्रवर्द्धन केन्द्र र निजगढ नगरपालिकाको लागत सहकार्यमा खरिद गरिएको इन्डक्सन चुलो बुधवारबाट वितरण गर्न थालिएको हो । नेपाल सरकार वैकल्पिक ऊर्जा प्रवर्द्धन केन्द्रको ६० प्रतिशत र निजगढ नगरपालिकाको ४० प्रतिशत लागतमा नगरपालिकाले इन्डक्सन चुलो वितरण गरेको हो । जसमा नगरपालिकाले नगरबासीहरुसंग अतिरिक्त १ हजार रुपैंया रकम सङ्कलन गरेको थियो ।

आर्थिक वर्ष २०७६र७७ मा वैकल्पिक ऊर्जा प्रवर्द्धन केन्द्र र नगरपालिकाबिच ईन्डक्सन चुलो वितरण गर्ने सम्झौता भएको थियो । परम्परागत दाउरा चुलो र आयातित ऊर्जाको श्रोत ग्यासको विकल्पको रूपमा नगरवासीहरुलाई इन्डक्सन चुलो वितरण गर्ने अवधारणा ल्याएको मेयर सुरेशकुमार खनालले बताए । विद्युतीय चुलोको प्रयोग मार्फत नागरिकको स्वास्थ्यमा सुधार हुने र जीवनस्तरमा समेत सुधार आउने आफूले विश्वास लिएको मेयर खनालले बताए । विद्युतीय चुलो वितरण कार्यक्रमलाई आगामी आर्थिक वर्षमा समेत निरन्तरता दिने लक्ष रहेको मेयर खनालले बताए ।

जडान सहित प्रति चुलो करिब ७ हजार रुपैंया लागत पर्न गएको निजगढ नगरपालिकाका सूचना अधिकृत रविन घिमिरेले बताए । पहिलो चरणमा नगरपालिकाले १ हजार थान विद्युतीय चुलो वितरण गरेको हो । नगरपालिकाको प्रमुख सहरी क्षेत्र रहेको वडा नम्बर ७,८ र ९ मा प्रति वडा ३ सय र अन्य वडामा प्रति वडा १० वटाको दरले १ हजार थान चुलो वितरण गरेको सूचना अधिकारी घिमिरेले बताए ।