काठमाडौं । कृषि तथा पशुपन्छी विकास मन्त्रालयका सचिव डा.रेवतीरमण पौडेलले डेरीको क्षेत्रमा आवश्यक नीति नियम तर्जुमा गर्न मन्त्रालय पूर्ण सहयोग गर्न तयार रहेको बताएका छन् ।

राजधानीमा आइतबार नेपाल डेरी एसोसिएशनको रजत जयन्तीसँगै वार्षिक साधारण सभाको कार्यक्रममा उनले आवश्यक नीतिनियम कार्यान्वयन र योजना तर्जुमा गर्ने हो भने त्यसमा मन्त्रालयको सहयोग रहने प्रतिबद्धता पनि व्यक्त गरे ।

उनले भने, ‘यस क्षेत्रमा देखा परेका समस्याहरुलाई समाधान गर्दै अगाडि बढ्नु पर्छ । यो क्षेत्रले सहरको पैसालाई गाउँमा लाने काम गर्छ र यसबाट गाउँलाई पनि समृद्ध बनाउन सकिन्छ । यो क्षेत्रमा आवश्यक नीतिनियम कार्यान्वयनमा ल्याउनु, योजना तर्जुमा गर्नु त्यसमा कृषि मन्त्रालयको तर्फबाट सहयोग गर्न हामी सधैं तयार छांै ।’

कृषिमा डेरी पुरानो र व्यवस्थित तरिकाले अगाडि बढेको क्षेत्र भएको भन्दै उनले यो क्षेत्रमा काम गर्नका लागि सबैको साथ र सहयोग आवश्यक भएको बताए ।

कार्यक्रममा नेपाल उद्योग वाणिज्य महासंघका उपाध्यक्ष हेमराज ढकालले कृषि सम्बन्धी नीतिनियम समयसापेक्षित रुपमा परिष्कृत हुन नसकेको भन्दै यसप्रति गम्भीर हुन आवश्यक भएको भनाइ राखे ।

उनले भने, ‘हाम्रो कृषि सम्बन्धी नीतिनियम पनि समय सापेक्षित रुपमा परिष्कृत हुनुपर्ने, त्यो पनि हुन सकेको छैन । यसले पनि यो क्षेत्रमा प्रभाव परेको छ । त्यसकारण नीतिनियमहरु परिष्कृत गर्दै डेरीका उत्पादनलाई संरक्षण गर्दै निर्यात गर्न सक्ने क्षेत्र बनाउनु पर्छ । यो क्षेत्रलाई गम्भीरतापूर्वक रुपमा हेर्न आवश्यक छ ।’

यस्तै, उनले सम्भावनाका क्षेत्र पर्यटन र कृषि भनेपनि यसको विकास हुन नसकेको भन्दै आयातमुखी घटाउदै निर्यातमुखी अर्थतन्त्र विकास गर्नु ठूलो चुनौती भएको बताए ।

उनले भने, ‘यो हाम्रो जीवन पद्धतिसँग जोडिएको क्षेत्र हो । यो सम्बन्धी पाठ्यक्रम पढाउने संस्थाको अभाव छ । हाम्रो सम्भावनाका क्षेत्र पर्यटन, कृषि भन्छौ तर यस्तो क्षेत्रहरुलाई पनि हामी यसरी लान्छौ भने हामीसँग उजागर नभएका र अन्य सामग्रीहरुलाई कसरी प्रवद्र्धन गर्छौ, कसरी आयातमुखी घटाउदै निर्यातमुखी अर्थतन्त्रमा लान्छौं भन्ने ठूलो प्रश्न छ ।’

कार्यक्रममा सहभागीहरुले डेरी क्षेत्रका समस्याहरु समाधानका लागि सरकारको ध्यानाकर्षण गराएका थिए ।