काठमाडौँ । स्वास्थ्य तथा जनसङ्ख्यामन्त्री प्रदीप पौडेलले स्वास्थ्य क्षेत्रमा सेवाको प्रभावकारीतालाई अझै बढाउन आवश्यक रहेको बताउनुभएको छ ।

शनिबार काठमाडौँमा आयोजित वीर अस्पतालको १३५औँ वार्षिकोत्सवका अवसरमा कार्यक्रममा बोल्दै उहाँले चिकित्सकीय जनशक्ति आजै उत्पादन गरेर बढाउन सक्ने स्थिति नरहेकाले सिमित चिकित्सकीय शक्ति, सीमित भौतिक पूर्वाधार, सीमित स्रोतकाबीचमा प्रभावकारी सेवा प्रदान गर्नुपर्ने बाध्यता रहेको बताउनुभयो ।

उहाँले भन्नुभयो,‘देश आर्थिक हिसाबले समस्यामा छ । स्रोत बढाउन सक्ने अवस्था छैन । सीमित स्रोतभित्र सत प्रतिशत परिणाम प्राप्त गर्नेगरी काम गर्नुपर्ने स्थिति छ । पूर्वाधार विकासमा आजको भोलि नै केही भइ हाल्दैन । दीर्घकालीन योजना अनुसार विस्तारै काम हुन्छ । तर, सेवाको प्रभावकारिता भने बढाउनुपर्ने हाम्रो बाध्यता छ । चिकित्सकीय जनशक्ति आजै उत्पादन गरेर बढाइहाल्न सक्ने अवस्था छैन । सीमित जनशक्ति, भौतिक पूर्वाधारका लागि सीमित स्रोतका बीचमा प्रभावकारी सेवा प्रदान गर्नुपर्ने आवश्यकता छ ।’

उहाँले वीर अस्पतालभित्रको सबै इकाईहरुको समन्वय र एकीकृत स्वास्थ्य प्रणाली विकासमा जरुरी रहेको औँल्याउनुभयो । व्यस्थापकीय पक्षमा सुधार गर्न सकेमा भइरहेको साधन र स्रोतभित्र रहेरपनि राम्रो परिणाम दिन सकिने उहाँको विश्वास छ ।

उहाँले भन्नुभयो,‘वीर अस्पतालभित्रको सबै इकाईहरुको समन्वय हुन जरुरी छ । एकीकृत स्वास्थ्य प्रणाली विकास गर्न जरुरी छ । व्यवस्थापन पक्षमा जेजे सुधार गर्नुपर्ने हो सबै सुधार गर्न सकिरहेको छैनौँ । यसमा सुधार गर्न सयौँ भने यही साधन स्रोतभित्र राम्रो परिणाम दिन सक्छौँ भन्ने मलाई लाग्छ ।’

उहाँले अस्पतालको इमर्जेन्सी सेवामा नागरिकको गुनासो रहेको भन्दै सबैले नागरिकको गुनासो सम्बोधन गर्नुपर्ने बताउनुभयो । उहाँले स्वास्थ्यकर्मीलाई काम गर्नका लागि सुरक्षित वातावरण निर्माणमा लागिपर्ने बताउनुभयो ।

मन्त्री पौडेलले स्वास्थ्य क्षेत्रको विकासका लागि वर्तमान सरकार गम्भीर रहेको भन्दै सबैको सहकार्यमा अघि बढ्ने प्रतिवद्धता जनाउनुभयो । स्वास्थ्य क्षेत्रमा आवश्यकता अनुसार दरबन्दी सिर्जना गर्नका साथै सेवा सुविधा विस्तार गर्ने उहाँको भनाइ छ ।