काठमाडौं । नेपाल मर्चेन्ट बैंकर्स संघ (NMBA) र एशोशिएशन अफ इन्भेष्टमेन्ट बैंकर्स अफ इन्डिया (AIBI) बीच पारस्परिक सहयोग र सहकार्यको लागि एक महत्वपूर्ण सम्झौता माघ ९ गते भारतको मुम्बई स्थित जियो वर्ल्ड कन्भेन्सन सेन्टरमा सम्पन्न भएको छ।

सम्झौतामा नेपाल मर्चेन्ट बैंकर्स संघका अध्यक्ष श्री रामेन्द्र रायमाझी र एआईबीआईका अध्यक्ष श्री महावीर लुनावतले हस्ताक्षर गरेका छन्। सम्झौताले दुवै देशका मर्चेन्ट बैंकरहरूको सीप विकास, व्यावसायिक क्षमता अभिवृद्धि, नैतिक मापदण्ड कायम गर्ने, तथा प्रविधि र सूचना आदानप्रदानमा सहकार्य गर्नेसमेत लक्ष्य राखेको छ।

सम्झौताअनुसार, दुई संघबीच सीप र क्षमता अभिवृद्धि, व्यवसायिक विकास, नियामक निकायसँग समन्वय र प्रविधि प्रयोगमा सहयोग गर्नेसम्बन्धी सहकार्य गर्नेछ। यस समझदारीले नेपाल र भारतको लगानी व्यवसायमा नयाँ मार्ग खोली, क्षेत्रको विकास र विस्तारमा महत्वपूर्ण भूमिका खेल्ने विश्वास गरिएको छ।

भारतको मुम्बईमा आयोजित एआईबीआईको १३औं वार्षिक सम्मेलनमा हस्ताक्षर गरिएको सम्झौतामा नेपाल मर्चेन्ट बैंकर्स संघका अन्य प्रमुख पदाधिकारीहरू पनि उपस्थित थिए। सम्मेलनमा भारतको आर्थिक उन्नतिमा AIBI को भूमिकाबारे छलफल भएको थियो।

यस सम्झौताले नेपाल र भारतबीचको लगानी र वित्तीय सहयोगलाई नयाँ उचाइमा पुर्याउने विश्वास व्यक्त गरिएको छ।