काठमाडौं । अर्थ मन्त्रालयमा नयाँ सचिव घनश्याम उपाध्यायलाई स्वागत गरिएको छ भने पूर्वसचिव डा. रामप्रसाद घिमिरेलाई बिदाइ गरिएको छ । मन्त्रिपरिषद्को हिजोको बैठकले उपाध्यायलाई अर्थ सचिवमा नियुक्त गर्ने निर्णय गरेको थियो भने डा. घिमिरे राष्ट्रपति कार्यालयमा सरुवा भएका छन् ।

अर्थ मन्त्रालयमा आयोजित कार्यक्रममा उपप्रधानमन्त्री तथा अर्थमन्त्री विष्णुप्रसाद पौडेलले नयाँ सचिव उपाध्यायको नेतृत्वमा अर्थ मन्त्रालयले राष्ट्र र जनताको अपेक्षा पूरा गर्ने विश्वास व्यक्त गरे । उनले डा. घिमिरेले अर्थतन्त्रलाई अनुशासित र गतिशील बनाउन दिइएको योगदानलाई सराहना गर्दै उनको अनुभव र ज्ञानलाई मन्त्रालयले भविष्यमा पनि उपयोग गर्ने बताए ।

नयाँ सचिव उपाध्यायले आफूलाई जिम्मेवारी दिइएकोमा नेपाल सरकार र अर्थमन्त्रीप्रति आभार व्यक्त गर्दै राजस्व वृद्धि, पूँजीगत खर्च बढाउने, अनावश्यक खर्च कटौती गर्ने, उत्पादनमा वृद्धि गर्ने लगायत कार्यमा ध्यान केन्द्रित गर्ने बताए । उनले थप लगानीका लागि अनुकूल वातावरण सिर्जना गर्ने प्रतिबद्धता पनि जनाए ।

डा. घिमिरेले सरकारले आफूलाई विश्वास गरी राजस्व सचिव र अर्थ सचिवको जिम्मेवारी दिइएकोमा धन्यवाद व्यक्त गर्दै नेपालको अर्थतन्त्रलाई सबल र गतिशील बनाउन आफू सदा सहयोग गर्ने बताए ।

यसरी अर्थ मन्त्रालयमा नयाँ सचिवको नियुक्ति र पूर्वसचिवको बिदाइ सँगै मन्त्रालयको नयाँ अध्याय सुरु भएको छ ।