काठमाडौं । नेपालको अर्थतन्त्रमा सुधारको संकेत देखिन थालेको उद्योगी व्यवसायीहरूले बताएका छन्। इकोनोमिक मिडिया एसोसिएसन नेपाल (इमान)को नवनिर्वाचित कार्यसमितिको सम्मानमा आयोजित कार्यक्रममा नेपाल उद्योग परिसंघ (सीएनआई)का अध्यक्ष तथा पदाधिकारीहरूले यस्तो बताएका हुन्।

कार्यक्रमपछिको अन्तर्क्रियामा सीएनआई अध्यक्ष राजेशकुमार अग्रवालले हालैका सूचकहरूले अर्थतन्त्रमा सकारात्मक संकेत देखिएको बताए। उनले भने, “राजनीतिक तहबाट पनि अब अर्थतन्त्रप्रति चिन्ता देखिन थालेको छ। कानुनी सुधारमा अध्यादेशमार्फत देखिएको तत्परता त्यसकै उदाहरण हो।”

उनले सबै राजनीतिक दलहरूलाई सत्ता भित्र वा बाहिरबाट पनि अर्थतन्त्रलाई प्राथमिकता दिनुपर्ने बताए। “नयाँ राजनीतिक व्यवस्था अभ्यासको चरणमा छ, यसले दबाब त सिर्जना गर्छ तर समाधान सम्भव छ,” उनले थपे।

अग्रवालका अनुसार, विदेशी विनिमय सञ्चिति प्रशस्त छ र बैंकहरूमा लगानीयोग्य पूँजी पनि उपलब्ध छ। तर, अर्कोतर्फ खराब कर्जाको अनुपात बढ्नु र कालोसूचीमा पर्नेहरुको संख्या बढ्नु चिन्ताको विषय बनेको छ। यद्यपि, हालै राष्ट्रिय तथ्यांक कार्यालयले सार्वजनिक गरेका सूचकहरूले सुधारको आशा देखाएको उनले जनाए।

उद्योगी व्यवसायीको मनोबल कानुनी सुधार, उच्चस्तरीय आर्थिक सुधार आयोगमा निजी क्षेत्रको सहभागिता, र आयोगको प्रतिवेदन कार्यान्वयनका पहलहरूले बढेको उल्लेख गरे। “सुधार सम्भव छ भन्ने देखिएको छ तर अझै धेरै काम गर्न बाँकी छ,” अग्रवालले स्पष्ट पारे।

उनले परिसंघले नीतिगत तथा कानुनी समस्याहरूको पहिचान गर्न ‘रिसर्च सेल’ गठन गरेर अनुसन्धान गरिरहेको जानकारी दिए। “हामी तथ्यमा आधारित सुझाव दिन्छौं, जुन सरकारका लागि उपयोगी हुन्छ,” उनले बताए।

कार्यक्रममा परिसंघका वरिष्ठ उपाध्यक्ष वीरेन्द्रराज पाण्डेले पनि अर्थतन्त्र सबैको प्राथमिकतामा परिरहेको बताए। “नीतिगत हस्तक्षेपको असर देखिन समय लाग्छ, तर सुधारको बाटोमा हामी हिँडिरहेका छौं,” पाण्डेले भने।

उपाध्यक्ष रोहित गुप्ता, महानिर्देशक घनश्याम ओझा, वरिष्ठ निर्देशक राजीव मजगैयाँ, निर्देशक मधुकर दाहाल लगायतको उपस्थिति रहेको कार्यक्रममा सीएनआई र इमानबीच सहकार्यको विषयमा समेत छलफल भएको थियो।

इमानका अध्यक्ष रोयल आचार्यले भने, “अर्थतन्त्रको पुनरुत्थानका लागि निजी क्षेत्रसँग मिलेर काम गर्न हामी सधैं तत्पर छौं।”