चितवन । चितवनको कलेज अफ मेडिकल साइन्सेस (पुरानो मेडिकल कलेज) मा न्यूरोसर्जरी सेवा पुनः सुरु भएको छ। वरिष्ठ न्यूरोसर्जन प्रा. डा. आइप चेरियनको नेतृत्वमा डा. बिपिन चौरसिया सहितको विशेषज्ञ चिकित्सक टोलीले सेवा दिन थालेको हो।

डा. चौरसियाका अनुसार अस्पतालले २४ घण्टा आकस्मिक न्यूरोसर्जरी सेवा र बिहान ९ बजेदेखि बेलुका ५ बजेसम्म ओपीडी सेवा उपलब्ध गराउनेछ। सवारी दुर्घटनाबाट हुने टाउको र मेरुदण्डको चोटजस्ता आकस्मिक न्यूरो ट्रामा केसहरूमा विशेष प्राथमिकता दिइने जनाइएको छ।

“हाम्रो टोली मस्तिष्कको ट्युमर, मस्तिष्क घात, ब्रेन एन्युरिजम, टाउकोमा पानी जम्ने, मेरुदण्डको ट्युमर वा फ्र्याक्चर, ढाड दुखाइ, खुट्टा झमझमाउने, पक्षाघात जस्ता सम्पूर्ण न्यूरो समस्याको उपचार गर्न सक्षम छ,” डा. चौरसियाले जानकारी दिनुभयो।

यस सेवाबाट चितवन र आसपासका बासिन्दालाई काठमाडौं जानुपर्ने झन्झट हट्ने र स्थानमै गुणस्तरीय न्यूरोसर्जरी सेवा प्राप्त हुने अस्पतालले जनाएको छ।