काठमाडौं। वरिष्ठ समाजसेवी तथा फोटो पत्रकार पासाङकाजी शेर्पा नेपाल आदिवासी जनजाति पत्रकार महासंघ (फोनिज) को संघीय सल्लाहकारमा मनोनित भएका छन्।

फोनिजको जिल्ला कार्यसमिति सदस्यको जिम्मेवारी सम्हाल्दै आएका शेर्पाको पत्रकारिता क्षेत्रमा पुर्‍याएको योगदानलाई उच्च मूल्यांकन गर्दै संघीय सल्लाहकारमा मनोनयन गरिएको फोनिजका एक पदाधिकारीले जानकारी दिए। संघीय सल्लाहकारमा मनोनित भएसँगै शेर्पाले जिल्ला कार्यसमितिबाट राजीनामा दिएका छन्।

फोनिज संघीय सचिवालयको गत शुक्रबार अध्यक्ष लक्की चौधरीको अध्यक्षतामा बसेको बैठकले १३ जना पत्रकार तथा व्यक्तित्वहरुलाई संघीय सल्लाहकारमा मनोनयन गरेको हो।

सल्लाहकार समितिको संयोजकमा फोनिजका निवर्तमान अध्यक्ष गजुरधन राई चयन भएका छन्। विधान अनुसार निवर्तमान अध्यक्षले संयोजक रहने व्यवस्था छ।

त्यस्तै सल्लाहकार समितिका सदस्यमा पूर्व अध्यक्षहरु — चन्द्रसिंह कुलुङ, खिम घले, मोहनसिंह लामा, डण्ड गुरुङ तथा उजीर मगर, मनोज घर्ती मगर, भैरव आङ्ला, अमरध्वज लामा, शान्ति गुरुङ, पुस्करभक्त माथेमा र सुकदेव चौधरी चयन भएका छन्।

बैठकले लेखा समिति सदस्यमा मञ्जु तामाङ र अनुशासन समितिको संयोजकमा निम्लिकी शेर्पा तथा सदस्यमा सन्तोष दहित र पूर्णिमा शाक्यलाई मनोनयन गरेको छ।

गत चैत २९–३० गते सम्पन्न आठौं महाधिवेशनबाट नयाँ कार्यसमिति चयन गरिएको फोनिजको संघीय समिति ४९ सदस्यीय रहने व्यवस्था छ। सचिवालय बैठकले आउँदो २६ औं वार्षिकोत्सव भव्यताका साथ मनाउने निर्णय समेत गरेको छ।