काठमाडौं । अग्नि ग्रुप अन्तर्गतको कम्पनी अग्नि मोटोइंक प्रालि ले नाइमा मोबिलिटी एक्सपो २०२५ मा नयाँ विद्युतीय स्कुटर ब्रान्ड ‘बिगस’ (BG) सार्वजनिक गरेको छ। राजधानीको भृकुटीमण्डपमा आयोजित कार्यक्रममा दुई मोडल— बीजी आरयूभी ३५० र बीजी सी १२— नेपाली बजारमा प्रस्तुत गरिएको हो।

बीजी आरयूभी ३५० दुई भेरिएन्टमा उपलब्ध छन्— RUV 350 IEX (मूल्य: रू. २,७९,४००) र RUV Max (मूल्य: रू. ३,२५,३००)। कम्पनीका अनुसार यो ‘इलेक्ट्रिक स्कुटरहरूको बिग ब्रदर’ हो, जसले स्कुटर र बाइक दुवैको विशेषता संयोजन गर्छ। यसमा १६ इन्चको अलोय ह्विल, १६० मिमि ग्राउन्ड क्लियरेन्स, ट्युब्युलर चेसिस, फुल मेटल बडी, १६५ एनएम टर्क, ७५ किमि/घन्टा टप स्पिड, क्रुज कन्ट्रोल, हिल होल्ड, विभिन्न राइडिङ मोड, र IP67 रेटेड मोटर-ब्याट्री जस्ता विशेषता छन्।

बीजी सी १२ पनि दुई भेरिएन्टमा आएको छ— C12 IEX (मूल्य: रू. २,२८,४००) र C12 Max 3.0 (मूल्य: रू. ३,०४,९००)। यो परिवारका लागि स्मार्ट इलेक्ट्रिक स्कुटरको रूपमा डिजाइन गरिएको छ। फराकिलो लेगरुम, २३ लिटर अन्डर-सिट स्टोरेज, TFT स्मार्ट डिस्प्ले, USB चार्जिङ, रिभर्स मोड, IP67 रेटेड ब्याट्री, एयर-कुल्ड ब्याट्री म्यानेजमेन्ट सिस्टम, र ३ वर्षको ब्याट्री वारेन्टी यसको प्रमुख विशेषता हुन्।

अग्नि ग्रुपले विगत तीन दशकदेखि गुणस्तरीय र प्रविधिमैत्री सवारी साधन बजारमा ल्याउँदै आएको छ। बिगसको उत्पादन केन्द्र भारतको पुणेमा रहेको छ, जसको वार्षिक उत्पादन क्षमता एक लाख युनिट छ।