विराटनगर, नेपाल – अगस्ट १२, २०२५ – नुडल्स र स्न्याक्सको अग्रणी निर्माता तथा निर्यातकर्ता एशियन थाइ फुड्स लिमिटेड (ATF) ले आफ्नो आगामी प्रारम्भिक सार्वजनिक निष्कासन (IPO) को निष्कासन प्रबन्धकका रूपमा हिमालयन सेक्युरिटीज बैंकर लिमिटेडलाई नियुक्त गरेको छ।

सम्झौतामा एशियन थाइ फुड्सका अध्यक्ष शिवरतन शारडा र हिमालयन सेक्युरिटीज बैंकरका प्रमुख कार्यकारी अधिकृत सुभास बहादुर श्रेष्ठले हस्ताक्षर गरेका थिए। यस अवसरमा ATF का प्रबन्ध निर्देशक महेश जाजु, कार्यकारी निर्देशक राधेश्याम शारडा, निर्देशक आशिष जाजु तथा हिमालयन सेक्युरिटीजका नायब महाप्रबन्धक शंकर राजवाहक उपस्थित थिए।

यो साझेदारीले ATF लाई सार्वजनिक बजारमा प्रवेश गर्न र आगामी विस्तार योजनामा सहयोग पुर्याउने कम्पनीको विश्वास छ। विराटनगर र तौलिहवामा रहेका अत्याधुनिक उत्पादन एकाइमार्फत ATF ले रमपम, 2PM र प्रिती जस्ता लोकप्रिय ब्रान्डका नुडल्स तथा स्न्याक्स ३० भन्दा बढी देशमा निर्यात गर्दै आएको छ।

“ATF को विकास यात्रामा यो सम्झौताले नयाँ अध्याय सुरु गरेको छ,” प्रबन्ध निर्देशक महेश जाजुले बताए, “पुँजी बजारमा हिमालयन सेक्युरिटीजको अनुभवले आईपीओ प्रक्रियालाई सहज बनाउनेछ, जसले नवप्रवर्तन र विश्वव्यापी विस्तारमा मद्दत गर्नेछ।”

आईपीओको विस्तृत विवरण, समयरेखा र सेयर बाँडफाँटबारे जानकारी आगामी महिनाहरूमा सार्वजनिक गरिने कम्पनीले जनाएको छ।