काठमाडौं । माछापुच्छ्रे क्यापिटल लिमिटेडको छैटौं वार्षिक साधारण सभा आज, २०८२ भदौ ६ गते (२२ अक्टोबर २०२५) काठमाडौंको बालुवाटार प्यालेस बैंक्वेटमा सञ्चालक समितिका अध्यक्ष विश्वम्भर न्यौपानेको अध्यक्षतामा सम्पन्न भएको छ। सभामा कम्पनीका प्रमुख कार्यकारी अधिकृतले विगत वर्षका उपलब्धि, चुनौती र आगामी योजनाबारे विस्तृत जानकारी दिँदै शेयरधनी मूल्य अभिवृद्धिमा कम्पनी प्रतिबद्ध रहेको उल्लेख गर्नुभयो।

सभामा सञ्चालक समितिको वार्षिक प्रतिवेदन, आ.व. २०८१/८२ को लेखापरीक्षण प्रतिवेदनसहितको वित्तीय विवरण, आ.व. २०८२/८३ का लागि लेखापरीक्षक नियुक्ति, नगद लाभांश वितरण तथा सञ्चालक निर्वाचनसम्बन्धी प्रस्तावहरू पारित भएका छन्।

संस्थापक समूहका तर्फबाट शिखर इन्स्योरेन्स कम्पनी लिमिटेडका प्रमुख कार्यकारी अधिकृत दिप प्रकाश पाण्डे पुनः सञ्चालकमा निर्विरोध निर्वाचित भएका छन्। साथै, सभाले चुक्ता पूँजीको ५% अर्थात् रु. १,४३,१६,९७५ बराबर नगद लाभांश वितरण गर्ने प्रस्ताव स्वीकृत गरेको छ।

सभा समापन गर्दै अध्यक्ष न्यौपानेले शेयरधनी, नियामक निकाय, साझेदार संस्था, कर्मचारी र सरोकारवालाप्रति आभार व्यक्त गर्दै कम्पनीलाई अझ मजबुत र सक्षम बनाउन निरन्तर सहयोगको अपेक्षा व्यक्त गर्नुभयो।