काठमाडौं । नाडा अटोमोवाइल्स एशोसिएशन अफ नेपालले आयोजना गरेको १७औं संस्करणको नाडा अटो शो २०२५ काठमाडौंको भृकुटीमण्डपमा ६ दिनसम्म भव्य रुपमा सम्पन्न भएको छ ।

कार्यक्रमको समापन स्वास्थ्य तथा जनसंख्या मन्त्री प्रदीप पौडेलको प्रमुख आतिथ्यतामा सम्पन्न भएको थियो भने उद्घाटन प्रधानमन्त्री केपी शर्मा ओलीले गर्नुभएको थियो । यसपटकको अटो शोमा १,७६,७८९ दर्शकले अवलोकन गरेका छन्, जुन अहिलेसम्मकै ऐतिहासिक सहभागिता मानिएको छ ।

प्रदर्शनीमा उड्ने कार, रोबोटिक म्यान, नयाँ मोडलका विद्युतीय सवारी साधन लगायतका आकर्षणले दर्शकलाई लोभ्याएको थियो । सुस्ताइरहेको अटोमोवाइल व्यवसायलाई चलायमान बनाउन यस प्रदर्शनी महत्त्वपूर्ण हुने आयोजक नाडाले जनाएको छ ।

अटो शोका क्रममा ‘इण्टरनेशनल अटो ट्रेड डायलग’, ‘ईभी एडप्सन इन नेपाल’, ‘कर्जा नीतिमा स्थिरता’, ‘फलाइङ्ग कार टेक्नोलोजी’, ‘युथ मोबिलिटी एण्ड नेशनल ड्रीम’, ‘सडक र यातायात’ र ‘मेड इन नेपाल’ जस्ता विषयमा अन्तरक्रिया कार्यक्रम समेत सम्पन्न भएका थिए ।

यसैबीच नाडाको केन्द्रीय कार्य समितिको २१औं बैठकले संस्थालाई ‘नाडा अटोमोवाइल्स महासंघ नेपाल’ मा रूपान्तरण गर्ने ऐतिहासिक प्रस्ताव गर्दै भाद्र २४ गते विशेष साधारण सभा बोलाउने घोषणा गरेको छ ।

स्टलतर्फ उत्कृष्ट चारपांग्रे सवारी स्टलको उपाधि एमएडब्लु अटो कर्पले, दुईपांग्रेमा रोयल इनफिल्ड अल्फा अटोमोटिभले, लाइट कमर्सियल भेहिकलतर्फ अद्धेत इभी प्रा.लि. ले र बैंक तथा इन्स्योरेन्सतर्फ ग्लोबल आईएमई बैंकले जितेका छन् ।

प्रदर्शनीमा प्रधानमन्त्री ओली, सभामुख देवराज घिमिरे, पूर्वप्रधानमन्त्री पुष्पकमल दाहाल प्रचण्ड, माधवकुमार नेपाल, मन्त्रीहरु, उच्च पदस्थ अधिकारीहरु, संघसंस्थाका प्रतिनिधि, उद्योगी व्यवसायी, कलाकार तथा खेलाडीहरुको उपस्थिति रहेको थियो ।