काठमाडौं । कामना सेवा विकास बैंक लिमिटेडले आफ्नो संस्थागत सामाजिक उत्तरदायित्व कार्यक्रम अन्तर्गत आन्दोलनका क्रममा जलेर नष्ट भएका कार्यालयहरूको सञ्चालनमा सहयोग गरेको छ।

पोखरा महानगरपालिका वडा नं ३० मा आवश्यक टेबल–कुर्सी हस्तान्तरण गर्दै बैंकको ढुङ्गेपाटन शाखा प्रबन्धक लक्ष्मी ढकालले वडाध्यक्ष दुर्गा प्रसाद सुवेदीलाई सामग्री बुझाउनुभयो। वडाध्यक्ष सुवेदीले सहयोगका लागि बैंकप्रति आभार व्यक्त गर्दै पुनःनिर्माणमा अन्य निकायलाई पनि सक्रिय हुन आग्रह गर्नुभयो।

यस्तै, बैंकले आन्दोलनका क्रममा जलेर नष्ट भएको जिल्ला प्रहरी कार्यालय, कास्कीलाई तत्काल आवश्यक पर्ने कम्प्युटर र प्रिन्टर हस्तान्तरण गरेको छ। पोखरा क्षेत्र प्रमुख शिव कुमार ढकालले उपकरणहरु डिएसपी हरि बहादुर बस्नेतलाई बुझाउनुभएको थियो।

बैंकले विभिन्न वडा कार्यालय, मालपोत कार्यालय र प्रहरी कार्यालयहरूलाई पुनःनिर्माण, मर्मत सम्भार तथा आवश्यक सामग्री सहयोग गर्ने अभियान अघि बढाएको जनाएको छ।