काठमाडौं । नेपाल उद्योग वाणिज्य महासंघका अध्यक्षले हालैको जेन–जी आन्दोलनका क्रममा उद्योग–व्यवसायमा भएको तोडफोड र आगजनीले आफूलाई गहिरो पीडा पु¥याएको बताएका छन् । उनले दशौँ हजार नेपालीको रोजगारी जोडिएको आफ्नै उद्योग–व्यवसायमा अर्बौंको क्षति हुँदा पनि मनोबल कमजोर नपार्न व्यवसायीहरूलाई आह्वान गरेका छन् ।

उनका अनुसार, शून्यबाट सुरु गरेर चार दशकको मेहनत, इमान्दारिता र अठोटले आजको व्यवसायिक जग खडा भएको भए पनि हालको विपत्तिमा निराश नहुनुपर्ने बेला आएको छ । “भूकम्प, नाकाबन्दी, महामारी र आर्थिक मन्दी जस्ता संकट काटेर उठेका हामी आज फेरि खरानी टक्टकाएर उठ्नैपर्छ,” उनले भने ।

अध्यक्षले हालको परिस्थितिले उद्योग–व्यवसाय मात्र नभई लाखौँ रोजगारी संकटमा पारेको, वैदेशिक लगानीकर्तामा नकारात्मक सन्देश गएको र मुलुककै अर्थतन्त्रमा धक्का पुगेको स्वीकार गरे । तर पनि उनले “हाम्रो वास्तविक सम्पत्ति हौसला, आत्मबल र श्रम गर्ने क्षमता हो, जुन कहिल्यै जल्दैन,” भन्दै व्यवसायीलाई हिम्मत नहराउन आग्रह गरे ।

उनले उद्यमी–व्यवसायीलाई क्षतिग्रस्त उद्योग–व्यवसाय पुनर्निर्माणमा जुट्न, थप लगानी गरेर रोजगारी सिर्जनामा लाग्न र चुनौतीलाई आर्थिक सुधारको अवसरको रूपमा लिन आह्वान गरे । साथै, नयाँ पुस्तालाई निजी क्षेत्र नै अर्थतन्त्रको इन्जिन हो भन्ने कुरा बुझाउनुपर्नेमा जोड दिए ।

“आउनुहोस्, सबैको साहस र निजी क्षेत्रको प्रयासले सुनौलो नेपालको मार्गचित्र कोर्न सन्देश दिन सकिने गरी काम गरौँ,” अध्यक्षको सन्देशमा उल्लेख छ ।