काठमाडौँ । नेपालको पहिलो महिला प्रधानमन्त्रीमा सुशीला कार्की नियुक्त भएको अवसरमा राष्ट्रिय निजी तथा आवासीय विद्यालय एसोसिएसन नेपाल (नेसनल प्याब्सन) ले बधाईसहित शुभकामना व्यक्त गरेको छ।

संगठनले शुक्रबार एक विज्ञप्ति जारी गर्दै प्रधानमन्त्री कार्कीको नेतृत्वमा शिक्षा क्षेत्रमा गुणस्तरीय सुधार, समावेशी पहुँच र दीगो विकास सुनिश्चित हुने विश्वास प्रकट गरेको हो।

नेसनल प्याब्सनकी अध्यक्ष गीता क्षेत्री राणा र महासचिव प्रतापबहादुर थापाले हस्ताक्षर गरेको विज्ञप्तिमा हालै मुलुकभर ‘जेन जेड’ युवाहरूले सुधारका माग राख्दै सञ्चालन गरेका आन्दोलनका क्रममा ज्यान गुमाएकाप्रति श्रद्धाञ्जली अर्पण गर्दै शोकसन्तप्त परिवारप्रति समवेदना प्रकट गरिएको छ। साथै घाइतेहरूको शीघ्र स्वास्थ्यलाभको कामना समेत गरिएको छ।

विज्ञप्तिमा शिक्षा जीवनको आधारशिला भएको उल्लेख गर्दै प्रधानमन्त्री कार्कीको कार्यकालमा गुणस्तरीय शिक्षा सुनिश्चित गर्ने, पेशागत सम्मान कायम गर्ने, निजी तथा आवासीय विद्यालयहरूको लगानी र विकासलाई प्रोत्साहन गर्ने, शैक्षिक पूर्वाधार सुधारमार्फत दीगो विकास गर्ने तथा शिक्षा क्षेत्रमा रोजगारी र स्वरोजगारीका अवसर सिर्जना गर्नुपर्ने आवश्यकता औंल्याइएको छ।

संगठनले संविधानको रक्षा गर्दै शिक्षा, शान्ति, प्रगति र समृद्धिलाई सुनिश्चित गर्ने दिशामा अघि बढ्नुपर्नेमा जोड दिँदै मुलुकलाई शैक्षिक गन्तव्यका रूपमा प्रवर्द्धन गर्न तथा शैक्षिक पर्यटनमार्फत विश्वभर सकारात्मक सन्देश प्रवाह गर्न सकिने विश्वास पनि प्रकट गरेको छ।

युवाहरूको चाहनाअनुरूप शिक्षामा समान पहुँच, स्वतन्त्र पेशा(व्यवसायको वातावरण र लगानी प्रवर्द्धनमा प्रधानमन्त्रीको कार्यकाल महत्त्वपूर्ण बन्नेमा आफूहरू विश्वस्त रहेको नेसनल प्याब्सनले जनाएको छ।