काठमाडौं । नेपाल बीमा प्राधिकरणका अध्यक्ष जनक राज शर्माले आज औपचारिक रूपमा प्राधिकरणमा अध्यक्षको कार्यभार सम्हाल्नुभएको छ । आजै बिहान अर्थमन्त्री रामेश्वरप्रसाद खनालले उहाँलाई पद तथा गोपनीयताको शपथ गराउनुभएको थियो ।

नेपाल सरकार, मन्त्रिपरिषद्को २०८२ असोज ९ गतेको निर्णय अनुसार, अर्को व्यवस्था नभएसम्म अध्यक्ष शर्माले प्राधिकरणको कामकाज अघि बढाउने जिम्मेवारी पाउनुभएको हो । शर्मा हालसम्म अर्थ मन्त्रालयमा कार्यरत रहनुभएको थियो ।

कार्यभार ग्रहण गर्दै अध्यक्ष शर्माले हालको चुनौतीपूर्ण अवस्थामा बीमा सेवाको गुणस्तर र विश्वसनीयता वृद्धि गर्न, बीमा दाबी भुक्तानीलाई छिटोछरितो र प्रभावकारी बनाउन आवश्यक रहेको बताउनुभयो । उहाँले बीमा कम्पनीहरूले प्रचलित कानूनअनुसार पारदर्शी र सहज सेवा दिनुपर्नेमा जोड दिँदै दाबी भुक्तानी प्रक्रियालाई झन्झटरहित बनाउन आग्रह गर्नुभयो ।

शर्माले भन्नुभयो, “बीमाप्रतिको विश्वास बढाउन गुणस्तरीय सेवा अनिवार्य छ । दाबी भुक्तानी समयमै भएमा बीमाको दायरा विस्तार हुन्छ र विस्तारसँगै लागत पनि कम हुँदै जान्छ ।”

उहाँले प्राधिकरणका कर्मचारीहरूलाई सही नियतका साथ गुणस्तरीय र शीघ्र कार्यसम्पादन गर्न निर्देशन दिनुभयो । अध्यक्ष शर्मालाई प्राधिकरणका निर्देशक र कर्मचारीहरूले स्वागत गरेका थिए ।