हेटौडा । मनहरी गाउँपालिका–२ च्यापलका किसानहरूका लागि गाईपालन र दूध उत्पादन मुख्य आम्दानीको स्रोत बनेको छ। यहाँका अधिकांश किसानले लोकल जातका गाई पाल्दै दूध उत्पादन गरेर आफ्नो दैनिकी सञ्चालन गर्दै आएका छन्।

स्थानीय किसानहरूले बिहान–बेलुका गाई दुह्ने काम नियमित जीवनचर्या बनाएका छन्। जुलुस सिंह स्याङ्बो र टिउकी माया तामाङका अनुसार, “हामीले पाल्ने लोकल गाईको दूध स्वादिलो र गुणस्तरीय हुन्छ, त्यसैले बजारमा यसको माग राम्रो छ।” दूध बिक्रीबाट प्राप्त आम्दानीले परिवारको खर्च, बालबालिकाको शिक्षा र घरधुरीका आवश्यकतामा सहयोग पुगेको छ।

मनहरी र आसपासका दूध संकलन केन्द्रहरूले किसानहरूबाट दैनिक रूपमा दूध संकलन गरी हेटौडा बजार र विभिन्न दुग्ध उद्योगहरूमा आपूर्ति गर्दै आएका छन्। यसले गाउँस्तरमै रोजगार सिर्जना र आम्दानी वृद्धिमा योगदान पु-याएको छ।

स्थानीय सरकार पनि किसानलाई दिगो दुग्ध उत्पादनतर्फ आकर्षित गर्न पशु स्वास्थ्य सेवा, गोठ सुधार, दाना अनुदान र तालिम कार्यक्रमहरू सञ्चालन गर्दै आएको छ। किसानहरूका अनुसार, यी पहलहरूले गाईपालन व्यवसायलाई अझ व्यवस्थित र उत्पादक बनाएको छ।

हाल च्यापल क्षेत्र दुग्ध उत्पादनका लागि मनहरी गाउँपालिकाको प्रमुख केन्द्रका रूपमा परिचित बन्दै गएको छ। किसानहरूको लगनशीलता र समर्पणका कारण गाउँमा दूध उत्पादन निरन्तर बढ्दै गएको छ र स्थानीय अर्थतन्त्रलाई मजबुत बनाइरहेको छ।