बुटवल । नेपालको लागि जिली EX5 इलेक्ट्रिक सवारीसाधनको आधिकारिक आयातकर्ता एलआरआर मोटर्सले बुटवलका लागि सोमार्जुन मोटर्सलाई आधिकारिक डिलर नियुक्त गरेको छ। कम्पनीको देशव्यापी डिलर विस्तार रणनीनअन्तर्गत बुटवलमा नयाँ शोरूमको आज विशेष समारोह बीच उद्घाटन गरिएको हो।

बुटवल र आसपासका क्षेत्रका ग्राहकलाई जिली EX5 का इलेक्ट्रिक सवारीसाधन स्थानीय स्तरमै उपलब्ध गराउने उद्देश्यसहित सोमार्जुन मोटर्सले निर्माण गरेको नयाँ शोरूम आज औपचारिक रूपमा सञ्चालनमा आएको छ।

एलआरआर मोटर्सले यो वर्षभित्र देशभर १४ वटा नयाँ डिलर स्थापना गर्ने घोषणा गरिसकेको छ। सो योजनाको पहिलो चरणको रूपमा बुटवल शोरूम उद्घाटनलाई कम्पनीले महत्वपूर्ण उपलब्धिका रूपमा लिएको छ।

उद्घाटनकै अवसरमा सोमार्जुन मोटर्सले दुईवटा जिली EX5 Max मोडल ग्राहकलाई हस्तान्तरण गरेको छ। पहिलो दिनमै दुई युनिट बिक्री हुनु जिली इभीप्रतिको स्थानीय माग र ग्राहकको रुचिको संकेत भएको कम्पनीले जनाएको छ।

नव–सञ्चालित शोरूममार्फत बुटवल तथा आसपासका क्षेत्रका ग्राहकले जिलीका EX5 Max र EX5 Pro मोडेलसहित बिक्री–पछिको सेवा, स्पेयर पार्ट्स तथा आवश्यक सहयोग एकै स्थानबाट प्राप्त गर्न सक्नेछन्।

सोमार्जुन मोटर्सका CEO अर्जुन भूषालले बुटवल क्षेत्रमा जिली इभी वितरण सुरु गर्न पाउँदा खुशी व्यक्त गर्दै भने, “हामीले यहाँका ग्राहकलाई विश्वसनीय, आधुनिक र सुरक्षित EV विकल्प प्रदान गर्ने लक्ष्यका साथ सेवा सुरु गरेका हौं। EX5 को गुणस्तर र प्रविधिप्रति हामी पूर्ण विश्वस्त छौं।”

उद्घाटन समारोहलाई सम्बोधन गर्दै एलआरआर मोटर्सका निर्देशक जीवन जंग शाहीले सोमार्जुन मोटर्स जस्ता सक्षम र प्रतिबद्ध साझेदारहरूले जिली ब्रान्डको देशव्यापी विस्तारलाई थप प्रभावकारी बनाउने विश्वास व्यक्त गरे। उनले नयाँ शोरूमले अत्याधुनिक सुविधा र उन्नत ग्राहक अनुभवप्रतिको कम्पनीको प्रतिबद्धता झल्काएको बताए।

सोमार्जुन मोटर्सले बुटवल क्षेत्रका इभी ग्राहकलाई आवश्यक सेवा पुर्‍याउन सक्षम जनशक्ति र जिलीको अन्तर्राष्ट्रिय मापदण्डअनुसारका सेवा सुविधा व्यवस्था गरेको जनाएको छ। अब बुटवलमा जिली EX5 सहज उपलब्ध भएपछि ग्राहकले गुणस्तरीय स्पेयर पार्ट्स, छिटो सेवा र उत्कृष्ट बिक्री–पछिको सुविधा पाउनेछन्।