काठमाडौं । नेशनल फण्ड म्यानेजमेन्ट लिमिटेडले सर्वसाधारणका लागि साधारण शेयर (IPO) निष्काशन गर्ने भएको छ। कम्पनीले रु १०० अंकित दरका २१ लाख ६ हजार कित्ता, अर्थात् रु २१ करोड ६ लाख बराबरको २० प्रतिशत साधारण शेयर निष्काशनका लागि निष्काशन तथा बिक्री प्रबन्धकको रूपमा लक्ष्मी सन्राइज क्यापिटल लिमिटेडलाई नियुक्त गरेको छ।

शेयर निष्काशनसम्बन्धी सम्झौतामा नेशनल फण्ड म्यानेजमेन्टका प्रमुख कार्यकारी अधिकृत सरोज गुरागाई र लक्ष्मी सन्राइज क्यापिटलका प्रमुख कार्यकारी अधिकृत विजय लाल श्रेष्ठले मिति २०८२ मंसिर ७ गते नयाँ बानेश्वरस्थित क्यापिटलको कार्यालयमा हस्ताक्षर गरेका छन्। सम्झौता अनुसार निकट भविष्यमै साधारण शेयर निष्काशन प्रक्रिया अघि बढाइनेछ।

नेशनल फण्ड म्यानेजमेन्ट लिमिटेड पब्लिक लिमिटेड कम्पनीका रूपमा दर्ता भई, नेपाल धितोपत्र बोर्डबाट विशिष्टीकृत लगानी कोष नियमावली, २०७५ अनुसार प्राइभेट इक्वीटी फण्ड, भेन्चर क्यापिटल फण्ड तथा हेज फण्ड संचालन गर्न अनुमति प्राप्त संस्था हो। साथै, कंपनीले बुक बिल्डिङ्ग प्रक्रियाबाट निष्काशित धितोपत्रका लागि योग्य संस्थागत लगानीकर्ताका रूपमा कार्य गर्ने स्वीकृति पनि पाएको छ।

कम्पनीले हाल नेशनल इक्विटी फण्ड–१ (विविधिकृत प्राइभेट इक्विटी फण्ड) तथा नेशनल हाइड्रो फण्ड–२ (उर्जा क्षेत्र लक्षित फण्ड) सञ्चालन गरिरहेको छ। क्रेडिट रेटिङ संस्थाबाट पनि कम्पनीले उपयुक्त रेटिङ प्राप्त गरेको जनाएको छ।

नेशनल फण्ड म्यानेजमेन्टमा सरकारी संस्थाको करिब २७ प्रतिशत, साथै विभिन्न बैंक, वित्तीय संस्था र एनआरएनहरूको लगानी रहेको छ। कम्पनीले विगत तीन वर्षदेखि नियमित रूपमा लाभांश वितरण गर्दै आएको छ।