काठमाडौं। आई.एम.ई. लाइफ इन्स्योरेन्स कम्पनीले सञ्चालक समिति अध्यक्ष, सदस्य, व्यवस्थापक तथा विभागीय प्रमुखहरू सहितका पदाधिकारीलाई सम्पत्ति शुद्धीकरण (Money Laundering) तथा आतंककारी वित्तीयकरण (Terrorist Financing) रोकथाम सम्बन्धी तालिम प्रदान गरेको छ।

तालिममा सम्पत्ति शुद्धीकरण, आतंककारी गतिविधि तथा विनाशकारी हातहतियार निर्माण वा विस्तारमा हुने वित्तीय लगानी निवारण (AML/CFT) सम्बन्धी विद्यमान ऐन–नियम, नियमनकारी निकायबाट जारी निर्देशिका तथा पछिल्लो समय जारी नयाँ कानूनी व्यवस्थाबारे विस्तृत जानकारी दिइएको थियो।

कार्यक्रममा बोल्दै सञ्चालक समितिका अध्यक्ष डा. रामहरि अर्यालले सम्पत्ति शुद्धीकरण रोकथाममा व्यवस्थापन, विभागीय प्रमुख तथा सम्पूर्ण कर्मचारीको समान जिम्मेवारी र योगदान आवश्यक हुनेमा जोड दिनुभयो। उहाँले AML/CFT कानूनको प्रभावकारी पालना यस कम्पनीको आन्तरिक नियन्त्रण, सुशासन सुदृढीकरण तथा ग्राहक–लगानीकर्ताको विश्वास वृद्धि गर्न महत्वपूर्ण हुने उल्लेख गर्नुभयो।

सोही अवसरमा प्रमुख कार्यकारी अधिकृत पवन कुमार खड्काले कम्पनीका सबै तहका कर्मचारीलाई AML/CFT सम्बन्धी कानूनी व्यवस्थाको कडाइका साथ पालना गर्न निर्देशन दिनुभयो। उहाँले नियामक निकायको अपेक्षाअनुसार कम्पनीलाई अझ अनुशासित र जवाफदेही बनाउने प्रतिवद्धता व्यक्त गर्नुभयो।