काठमाडौं । एनएमबि बैंक लिमिटेडले प्यासिफिक एशिया ट्राभल एसोसिएसन (PATA) नेपाल च्याप्टर र Visa सँग सहकार्य गर्दै डिजिटल भुक्तानी प्रविधि एनएमबि सफ्ट POS को प्रयोग विस्तार गर्न त्रिपक्षीय सम्झौता गरेको छ। शुक्रबार काठमाडौंमा आयोजित कार्यक्रममा उक्त सम्झौतामा हस्ताक्षर गरिएको हो।

सफ्ट POS प्रविधि प्रयोग गरेपछि व्यवसायीहरूले भौतिक POS मेसिनबिना नै NFC–समर्थित एंड्रोइड स्मार्टफोन प्रयोग गरी डिजिटल कार्ड भुक्तानी सहज रूपमा स्वीकृत गर्न सक्नेछन्। यसले भुक्तानी प्रक्रिया थप छरितो, सुरक्षित र सरल बनाउने बैंकको भनाइ छ।

PATA नेपाल च्याप्टरले होटल, ट्राभल एजेन्सी, एयरलाइन्सलगायत पर्यटन उद्योगलाई प्रतिनिधित्व गर्दै आएको छ। नयाँ सहकार्यमार्फत पाटाका सदस्यहरूलाई डिजिटल भुक्तानी प्रविधिमा अभ्यस्त बनाउँदै पर्यटन क्षेत्रमा आधुनिक भुक्तानी प्रणालीको प्रयोग बढाउने उद्देश्य राखिएको छ।

एनएमबि बैंकका अनुसार सफ्ट POS को विस्तारले पर्यटक र सेवा लिने ग्राहकहरूलाई सहजता प्रदान गर्ने, डिजिटल कारोबार वृद्धि गर्ने तथा वित्तीय पहुँच विस्तारमा मद्दत पुग्ने अपेक्षा गरिएको छ। यसले पर्यटन क्षेत्रमा डिजिटल भुक्तानीको स्वीकार्यता बढाउने विश्वास बैंकले व्यक्त गरेको छ।

हाल एनएमबि बैंकले देशभर २०२ शाखा, १८४ एटीएम र ९ एक्सटेन्सन काउन्टर मार्फत सेवा प्रदान गर्दै आएको छ।